Ռիգայում 69 տարեկան հասակում մահացել է լրագրող Գրիգորի Նեխորոշևը՝ «Московский корреспондент» թերթի նախկին գլխավոր խմբագիրը։
Լրագրողի մահվան մասին հայտնել է Delfi հրատարակությունը՝ հղում անելով Լատվիայում բնակվող ռուս լրագրող Բոժենա Ռինսկային։
Նեխորոշևը մահացել է հունիսի 19-ին՝ իր բակում հավաքած սնկերով թունավորվելուց հետո։
Լրագրողը վերջին 11 տարիների ընթացքում ապրել է Լատվիայի մայրաքաղաքում որպես քաղաքական փախստական։ 2008 թվականին, երբ նա «Московский корреспондент» թերթի գլխավոր խմբագիրն էր, նա հոդված հրապարակեց Վլադիմիր Պուտինի և մարմնամարզուհի Ալինա Կաբաևայի սիրավեպի մասին։
Հրատարակությունից հետո թերթը փակվեց, իսկ Նեխորոշևին ԱԴԾ-ն կանչեց հարցաքննության։ Հետագայում նա արտագաղթեց Ռուսաստանից և ձեռք բերեց «Պուտինի անձնական թշնամու» համբավ։
Ռուսաստանի առաջնորդը հերքեց Կաբաևայի հետ իր հարաբերությունների մասին տեղեկատվությունը։ Այդ ժամանակ նա հայտարարել էր, որ բացասաբար է վերաբերվում այն մարդկանց, ովքեր իրենց «էրոտիկ ֆանտազիաներով» միջամտում են ուրիշի անձնական կյանքին։
.gif)
