Գիտնականները ստեղծել են ԱԲ-ի դեմ տառատեսակ, որը միայն մարդիկ են հասկանում

Արհեստական բանականության համակարգերից հաղորդագրությունները թաքցնելու նպատակով մշակվել է նոր՝ Ghost Font անվամբ տառատեսակը, որի հեղինակն է ծրագրավորող Էրիկ Լուն։ Այն հաղորդագրությունները ներկայացնում է ոչ թե ստատիկ տեքստով, այլ շարժվող կետերի միջոցով, ինչը, հեղինակի խոսքով, մարդու աչքի համար ընթեռնելի է, սակայն դժվար է վերծանել արհեստական բանականության ներկայիս մոդելների համար։

Լուի խոսքով՝ Ghost Font-ը ոգեշնչված է 2013 թվականին ստեղծված ZXX տառատեսակից, որը նախատեսված էր օպտիկական նիշերի ճանաչման ծրագրերից պաշտպանվելու համար։ Սակայն, քանի որ ժամանակակից արհեստական բանականությունը կարողանում է կարդալ ZXX-ով գրված տեքստը, նոր տարբերակում կիրառվել են շարժում, աղմուկ և խայծային հաղորդագրություններ։

Փորձարկումների ընթացքում մի շարք առաջատար արհեստական բանականության մոդելներ դժվարացել են վերծանել Ghost Font-ով ստեղծված հաղորդագրությունները։ Բացի այդ, տեսանյութի մեկ կադրից հնարավոր չէ հասկանալ, թե ինչ հաղորդագրություն է թաքնված, իսկ խայծային տեքստը կարող է մոլորեցնել որոշ մոդելների։

Հեղինակը կարծում է, որ տեխնոլոգիան ապագայում կարող է կիրառվել նաև CAPTCHA համակարգերում՝ ավտոմատացված բոտերից պաշտպանվելու համար։ Միևնույն ժամանակ նա ընդունում է, որ արհեստական բանականության արագ զարգացումը կարող է ժամանակի ընթացքում նվազեցնել այս մեթոդի արդյունավետությունը։

Ghost Font-ը սոցիալական ցանցերում արդեն փորձարկվել է օգտատերերի կողմից՝ ստանալով ինչպես դրական, այնպես էլ թերահավատ արձագանքներ։