Ով է ՔՊ-ական Ավետ Կոնջորյանը. ինչ է նրա մասին հայտնի

Ազգային ժողովի «Քաղաքացիական պայմանագիր» խմբակցության ղեկավար Հայկ Կոնջորյանի անունը վերջին տարիներին մշտապես եղել է քաղաքական օրակարգի կենտրոնում։ Սակայն նրա եղբոր՝ Ավետ Կոնջորյանի շուրջ կուտակված փաստերը ևս հանրային ուշադրության արժանի են։

«Ժողովուրդ» օրաթերթը ուսումնասիրել է դատական ակտերը, բիզնես կապերը և վերջին քրեական վարույթների վերաբերյալ հրապարակային տվյալները՝ հասկանալու համար, թե ով է իշխող ուժի ազդեցիկ պատգամավորի եղբայրը և ինչ հարցեր են առաջանում նրա գործունեության շուրջ:

Դատվածություն՝ խարդախության հոդվածով

Ավետ Կոնջորյանի կենսագրության ամենաուշագրավ դրվագներից մեկը վերաբերում է 2010 թվականին կայացված դատավճռին։

«Ժողովուրդ» օրաթերթը Դատական տեղեկատվական համակարգի տվյալներն էր հրապարակել, որ նա մեղավոր է ճանաչվել ՀՀ նախկին Քրեական օրենսգրքի 178-րդ հոդվածի 3-րդ մասի 1-ին կետով՝ առանձնապես խոշոր չափերի խարդախություն կատարելու համար։

2010 թվականի հունիսի 17-ին դատարանը նրան դատապարտել է 4 տարվա ազատազրկման, սակայն պատիժը պայմանականորեն չի կիրառվել՝ սահմանելով 3 տարվա փորձաշրջան։

Այս փաստը առանձնապես ուշագրավ է այն պատճառով, որ խոսքը ոչ թե վարչական խախտման, այլ առանձնապես խոշոր չափերի խարդախության մասին է, ինչը հանրային ընկալման մեջ լուրջ հարցեր է առաջացնում անձի հետագա բիզնես գործունեության վերաբերյալ:

Վարորդական իրավունքից զրկված վիճակում մեքենա վարելու գործը

Կոնջորյանի անունը կրկին հայտնվել է իրավապահների ուշադրության կենտրոնում արդեն 2025–2026 թվականներին։

Հրապարակված դատական նյութերի համաձայն՝ 2025 թվականի հուլիսին նա մեկ տարով զրկվել է տրանսպորտային միջոց վարելու իրավունքից։ Սակայն նույն տարվա հոկտեմբերին, ըստ վարույթի նյութերի, նա կրկին վարել է ավտոմեքենա։

Դրա հիման վրա նախաձեռնվել է քրեական վարույթ, որը հետագայում քննվել է «համաձայնությամբ տուգանք» ընթացակարգով։

«Միլոն Ռիելթի» և հարյուր միլիոնների հետքը

Ավետ Կոնջորյանի բիզնես գործունեությունը ևս հետաքրքիր շերտ ունի։

Նա եղել է 2023 թվականին հիմնադրված «Միլոն Ռիելթի» ՍՊԸ-ի տնօրենը և այդ պաշտոնը զբաղեցրել մինչև 2026 թվականի հունվարի 5-ը։

Ընկերությունը կապվում է գործարար Բաբկեն Հովակիմյանի և «Միլոն Մայնինգ» ՍՊԸ-ի հետ։ Հենց այստեղ է սկսվում ամենահետաքրքիր հատվածը։

Մամուլում հրապարակված տեղեկությունների համաձայն՝ Կոնջորյանը մասնակցել է Աբովյան համայնքի Առինջ բնակավայրում գտնվող հողամասի օտարման գործարքի ձևակերպմանը, որի արժեքը կազմել է 541 միլիոն դրամ։

Ավետ Կոնջորյանի շուրջ հրապարակային փաստերը ձևավորում են հակասական պատկեր․

• դատվածություն՝ առանձնապես խոշոր չափերի խարդախության համար,
• նոր քրեական վարույթ՝ վարորդական իրավունքից զրկված վիճակում մեքենա վարելու պատճառով,
• կապեր խոշոր անշարժ գույքի գործարքների և բիզնես կառույցների հետ։

Մինչ իրավապահ մարմինները որևէ նոր գնահատական չեն տվել նրա գործունեությանը, այս պատմությունը շարունակում է մնալ քաղաքական և հանրային հետաքրքրության կարևոր թեմա՝ հատկապես այն պատճառով, որ այն առնչվում է Հայաստանի իշխող քաղաքական ուժի ամենաազդեցիկ դեմքերից մեկի ընտանիքին։

Սոնա Գրիգորյան