ՏԵՍԱՆՅՈՒԹ․ ՊԵԿ նախկին նախագահ (Տամոժնի Գագո) ձերբակալում են

Գագիկ Խաչատրյանի նկատմամբ ձերբակալման որոշում է կայացվել․ խուզարկություններ՝ նրա, որդու բնակարաններում և 21 ընկերություններում։

ՀՀ քննչական կոմիտեն հայտնել է, որ ՊԵԿ նախկին նախագահ Գագիկ Խաչատրյանի վերաբերյալ կայացվել է ձերբակալման որոշում։ Որոշումը կայացվել է առանձնապես խոշոր չափերով կաշառք ստանալու և առանձնապես խոշոր չափերով փողերի լվացման դեպքերի առթիվ նախաձեռնված քրեական վարույթի շրջանակում։

ՔԿ-ի փոխանցմամբ՝ վարույթի շրջանակում իրականացվել են անհետաձգելի քննչական և վարութային գործողություններ։ Մասնավորապես, խուզարկություններ են կատարվել Գագիկ Խաչատրյանի և նրա որդու բնակարաններում։

Սակայն իրավապահների գործողությունները միայն բնակարաններով չեն սահմանափակվել։ Քննչական գործողություններ են իրականացվել նաև Խաչատրյանների հետ փոխկապակցված շուրջ 21 ընկերությունների գրասենյակներում և մասնաճյուղերում։

Այս հանգամանքը ուշագրավ է, քանի որ խոսքը միայն մեկ անձի նկատմամբ իրականացվող իրավական գործընթացի մասին չէ․ քննության շրջանակը փաստացի հասնում է նաև նրա ընտանիքի և նրանց հետ կապ ունեցող բիզնես կառույցների։

ՔԿ-ն առայժմ չի մանրամասնել, թե կոնկրետ ինչ ընկերությունների մասին է խոսքը, ինչ գումարների չափի մասին է քննությունը, ինչպես նաև ինչ ապացույցներ են ձեռք բերվել իրականացված խուզարկությունների արդյունքում։

Գագիկ Խաչատրյանը նախկինում ևս հայտնվել է իրավապահների ուշադրության կենտրոնում։ Նրա դեմ հարուցված քրեական գործերով տարիներ շարունակ քննվել են պաշտոնեական լիազորությունների չարաշահման, ապօրինի հարստացման և այլ ենթադրյալ հանցագործությունների վերաբերյալ դրվագներ։

Այս նոր վարույթի շրջանակում, սակայն, իրավապահները շեշտադրում են հատկապես առանձնապես խոշոր չափերով կաշառքի ստացման և փողերի լվացման ենթադրյալ դեպքերը։

Կարևոր է ընդգծել, որ ձերբակալման որոշման առկայությունը դեռևս չի նշանակում մեղավորության հաստատում։ Գագիկ Խաչատրյանի և մյուս հնարավոր ներգրավված անձանց մեղավորությունը կարող է հաստատվել միայն դատարանի՝ օրինական ուժի մեջ մտած դատավճռով։

Սոնա Գրիգորյան

Մանրամասները՝ տեսանյութում․