Նեպալում փրկարարները սեպտեմբերի 4-ին հիդրոէլեկտրակայանի թունելից դուրս են բերել երկու աշխատակցի, որոնք այնտեղ էին մնացել օգոստոսի 26-ին տեղի ունեցած ավերիչ ջրհեղեղից հետո։ Աշխատակիցները թունելում փակված են եղել 9 օր։
Փրկվածները 30-ամյա Սանջայ Շահն է՝ մեխանիկ-վարպետ, և 45-ամյա Քաբիր Մահարջանը՝ մեխանիկ-վերահսկիչ։ Նրանց դուրս բերելուց հետո տեղափոխել են Նեպալի մայրաքաղաք Կատմանդուի հիվանդանոց։ Պաշտոնյաների փոխանցմամբ՝ երկուսի առողջական վիճակը կայուն է։
Փրկարարական աշխատանքներն իրականացվել են Տրիշուլի 3A հիդրոէլեկտրակայանի թունելում, որը գտնվում է Տրիշուլի գետի ափին։ Փրկարարները թունելում գտնվող աշխատակիցներին հասնելու համար մաքրել են մոտ 50-60 մետր բեկորներ։
Փրկարարական գործողությանը հեռակա կարգով աջակցում էր նաև ավստրալացի փրկարարական փորձագետ Առնոլդ Դիքսը, որը մասնագիտացած է թունելների փլուզումների հետևանքով իրականացվող փրկարարական աշխատանքներում։ Նրա խոսքով՝ փրկարարները թունելի ներսից թույլ արձագանք էին լսել, ինչը հույս էր տվել, որ այնտեղ մարդիկ կարող են ողջ լինել։
Տրիշուլի 3A հիդրոէլեկտրակայանի տարածքում առնվազն 557 աշխատակից համարվում է անհետ կորած։ Տեղական իշխանությունների տվյալներով՝ նրանցից շուրջ 115-ը կարող են գտնվել գլխավոր թունելի ներսում։ Փրկարարները շարունակում են որոնողական աշխատանքները՝ հույս ունենալով, որ հնարավոր կլինի հայտնաբերել նաև այլ ողջ մնացածների։
Ընդհանուր առմամբ, Նեպալի 12 հիդրոէլեկտրակայաններում մոտ 900 աշխատակից համարվում է անհետ կորած, որոնցից շուրջ 500-ը, ըստ տեղական իշխանությունների, կարող են արգելափակված լինել թունելներում։
Օգոստոսի 26-ին Նեպալում տեղի ունեցած աղետը, որը կապված էր սառցադաշտի փլուզմամբ առաջացած հզոր ջրային հոսքերի հետ, մեծ ավերածություններ է պատճառել։ Փրկարարական խմբերը Նեպալում հայտնաբերել են ավելի քան 1250 զոհվածների մարմիններ, իսկ ավելի քան 5000 մարդ շարունակում է համարվել անհետ կորած։
Աղետի հետևանքները տարածվել են նաև Չինաստանի Տիբեթի հատվածում։ Չինաստանի իշխանությունների վերջին տվյալներով՝ այնտեղ զոհվել է 21 մարդ, իսկ 541-ը համարվում է անհետ կորած։
Անի Վարդանյան
.gif)
