Ադրբեջանական լրատվամիջոցները հայտնում են, որ Ադրբեջանի նախագահ Իլհամ Ալիևը հայտարարել է՝ Ղարաբաղում Ադրբեջանի տարած հաղթանակը տարածաշրջանում նոր աշխարհաքաղաքական իրողության հիմք է դրել և պայմաններ ստեղծել «Զանգեզուրի միջանցքի» իրականացման համար։
Ինչպես գրում է ադրբեջանական APA գործակալությունը, այս մասին Ալիևը նշել է Թյուրքական պետությունների կազմակերպության անդամ երկրների անվտանգության խորհուրդների քարտուղարների հինգերորդ նիստի մասնակիցներին ուղղված իր ուղերձում։
Ալիևի խոսքով՝ վեց տարի առաջ Ադրբեջանի արձանագրած հաղթանակը Ղարաբաղում, որը նա անվանել է «ընդհանուր հպարտության աղբյուր», հիմք է դրել տարածաշրջանում նոր աշխարհաքաղաքական իրողության ձևավորման համար։
«Միևնույն ժամանակ, այս հաղթանակը հիմք ստեղծեց Զանգեզուրի միջանցքի իրականացման համար՝ պատմական երթուղի, որը տնտեսական, լոգիստիկ և ռազմավարական առումներով կապում է մեր երկրները»,-ասել է Ադրբեջանի նախագահը։
Նա նաև շնորհակալություն է հայտնել Թյուրքական պետությունների կազմակերպության անդամ երկրներին՝ Ադրբեջանի կողմից «օկուպացիայից ազատագրված» տարածքների վերակառուցման և վերականգնման գործընթացին աջակցելու համար։
Ալիևը նշել է, որ այդ նախաձեռնությունները Ադրբեջանի ժողովրդի կողմից ընդունվում են «խոր հարգանքով և երախտագիտությամբ»։
Անի Վարդանյան
.gif)
