Թրամփը պատրաստվում է Վաշինգտոնում ընդունել Սի Ցզինպինին․ ի՞նչ հարցեր են օրակարգում

ԱՄՆ նախագահ Դոնալդ Թրամփն այս շաբաթ Վաշինգտոնում կընդունի Չինաստանի նախագահ Սի Ցզինպինին։ Սպասվում է, որ Չինաստանի առաջնորդին անձամբ կդիմավորի Թրամփը Էնդրյուսի ռազմաօդային բազայում, իսկ հաջորդ օրը Սպիտակ տանը նախատեսվում է պաշտոնական դիմավորման արարողություն՝ ռազմական ինքնաթիռների թռիչքով և շուրջ 500 զինծառայողների մասնակցությամբ։

Սի Ցզինպինի այցը ԱՄՆ նրա առաջին պետական այցն է շուրջ մեկ տասնամյակի ընթացքում և Թրամփի երկրորդ նախագահական ժամկետի մեկնարկից ի վեր երկու առաջնորդների երրորդ հանդիպումը։ Այցը կավարտվի ուրբաթ օրը և կուղեկցվի պաշտոնական ընթրիքներով, մասնավոր շրջայցերով ու մշակութային միջոցառումներով։

Հանդիպումների առանցքային թեմաներից մեկը լինելու է ԱՄՆ-Չինաստան առևտուրը։ 2025 թվականի հոկտեմբերին ձեռք բերված առևտրային համաձայնությունը, որով Վաշինգտոնը կասեցրել էր չինական ապրանքների նկատմամբ մաքսատուրքերի բարձրացումը, իսկ Պեկինը մեղմացրել էր հազվագյուտ հողային մետաղների արտահանման սահմանափակումները, նոյեմբերին լրանալու է։ Փորձագետները սպասում են, որ կողմերը կքննարկեն դրա երկարաձգման հնարավորությունը։

Միաժամանակ, ԱՄՆ-ի և Չինաստանի միջև առևտրային բանակցությունները, որոնք անցկացվել են ՄԱԿ-ի Գլխավոր ասամբլեայի շրջանակում, ըստ BBC-ի աղբյուրների, էական առաջընթաց չեն գրանցել։ Բանակցությունների ընթացքում քննարկվել են ոչ սակագնային առևտրային հարցերն ու գյուղատնտեսական ապրանքների արտահանումը։ Բանակցությունները նախատեսվում է շարունակել Վաշինգտոնում։

Օրակարգում կլինի նաև արհեստական բանականությունը։ ԱՄՆ-ն ու Չինաստանը մրցակցում են այս ոլորտում, իսկ Թրամփը բազմիցս ընդգծել է, որ արհեստական բանականության մրցավազքում Չինաստանին հաղթելը ԱՄՆ-ի առաջնահերթություններից է։ Փորձագետները չեն բացառում, որ կողմերը կքննարկեն նաև արհեստական բանականության ոլորտում համագործակցության հնարավորությունները։

Առանձին կարևոր թեմա է Թայվանը։ ԱՄՆ Կոնգրեսը հաստատել է Թայվանին բազմամիլիարդանոց սպառազինության վաճառքը, սակայն գործարքը դեռ սպասում է Թրամփի ստորագրությանը։ Չինաստանը երկար տարիներ հայտարարել է Թայվանի հետ «վերամիավորվելու» իր մտադրության մասին և չի բացառել ուժի կիրառումը։

Սի Ցզինպինի այցի ընթացքում քննարկվելու են նաև ԱՄՆ-Չինաստան հարաբերությունների ընդհանուր բնույթն ու տնտեսական համագործակցությունը։ ԱՄՆ-ում, սակայն, Չինաստանի նկատմամբ վերաբերմունքը միանշանակ չէ․ Թրամփի վարչակազմի որոշ ներկայացուցիչներ և նրա աջակիցների մի մասը Պեկինին դիտարկում են որպես ազգային անվտանգության և տնտեսական մրցակցության լուրջ մարտահրավեր։

Միևնույն ժամանակ, ԱՄՆ-Չինաստան հարաբերություններում Թրամփը կարևորում է անձնական շփումները Սի Ցզինպինի հետ։ ԱՄՆ-Չինաստան հարաբերությունների ազգային կոմիտեի նախագահ Սթիվեն Օրլինսի խոսքով՝ Թրամփը կարծում է, որ երկու առաջնորդների հաճախակի հանդիպումները կարող են նվազեցնել հարաբերությունների առճակատման մակարդակը։

Անի Վարդանյան