Հունիսի 8-ին գորիսեցիները քաղաքապետ կընտրեն: Քաղաքագլխի պաշտոնի համար պայքարում է 4 թեկնածու` «ԳԱՄՄԱ» գործարանի տնօրեն Տիգրան Կարապետյանը, Արա Բուդաղյանը, Վաչագան Ադունցը և անկուսակցական Հրայր Յոլյանը:
Գորիսի նախկին քաղաքապետ Սամվել Հարությունյանը armlur.am-ի հետ զրույցում ասաց, որ քանի դեռ Սյունիքում շարունակում է իր ազդեցությունը պահպանել, իր խոսքերով, տխրահռչակ Լիսկան, ապա արդար ընտրությունների մասին խոսելն անիմաստ է:
«Սուրեն Խաչատրյանն անելու է առավելագույնը` կրկնելու քաղաքապետի նախորդ ընտրությունների սցենարը»,- կարծում է նախկին քաղաքապետը:
Ըստ Խաչատրյանի` Գորիսին անհրաժեշտ է ազգային-ազատագրական պայքար, գորիսեցիներին անհրաժեշտ է լիցքավորվել և հավաքական ընդվզման ճանապարհով վերջակետ դնել Լիսկայի արյունոտ տիրապետությանը:
Սամվել Հարությունյանի համար կարևոր են ոչ այնքան ընտրությունները, քանի որ նախ թեկնածուներին անձնապես չի ճանաչում, որքան գորիսեցիների արդարամտությունն ու վճռականությունը: Նախկին քաղաքապետը պատրաստվում է կոչով հանդես գալ և իր խոսքն ուղղել գորիսեցիներին, որպեսզի նրանք հավաքվեն և ազատվեն Սուրեն Խաչատրյանի տիրապետությունից:
Անդրադառնալով Սյունիքի մարզպետ Վահե Հակոբյանի դիրքորոշմանը կայանալիք ընտրություններին` Գորիսի նախկին քաղաքապետն ասաց, որ կցանկանար, որ Վահե Հակոբյանը ևս լիսկայաթափման գործընթաց սկսեր, սակայն ջանքեր նրա կողմից Սամվել Հարությունյանը չի տեսնում:
Հարությունյանի համար դեռ պարզ չէ նաև Գորիսի քաղաքապետի աթոռի համար պայքարողները ընտրապայքարի են գնում, թե՞ ազատագրական պայքար սկսելու հրամայականին են ենթարկվում:
Սոնա Դավթյան
.gif)
