Ինչպես կառավարության նախորդ, այնպես էլ այս ծրագրում առանձնահատուկ տեղ է հատկացված գյուղատնտեսության ոլորտի զարգացմանն ու հեռանկարներին: Թեև նոր ծրագիրն առանձնապես չի տարբերվում նախորդից, այնուամենայնիվ, որոշ կոնկրետացումներ արվել են այս ծրագրում, մասնավորապես, կարևորվում է կոոպերատիվներին դրամաշնորհային աջակցությունը վերամշակող արտադրությունների հիմնման ծախսերի մինչև 50 տոկոսի չափով, ինչպես նաև հանքային պարարտանյութի, դիզելային վառելանյութի, տարբեր մշակաբույսերի բարձր վերարտադրության սերմերի մատչելիության մակարդակի բարձրացման ծրագրերը` գների մասնակի սուբսիդավորման և ապրանքային վարկերի միջոցով:
Ագրարագյուղացիական միավորման նախագահ, գյուղատնտես Հրաչ Բերբերյանը armlur.am-ի հետ զրույցում ասաց, որ նորանշանակ վարչապետը փորձում է փոփոխություն մտցնել գյուղմթերք արտադրողների գործունեության մեջ:
Ինչ վերաբերում է կոոպերատիվներին ֆինանսապես աջակցելուն, Բերբերյանը կարծում է, որ կոոպերատիվները պետք է ստեղծվեն ներքևից` գյուղացիների պահանջով, ոչ թե վերևից` պարտադրանքով:
«Ստալինի ժամանակներից տեսանք, թե վերևից պարտադրված կոլխոզներն ինչ ճակատագիր ունեցան: Կառավարությունը պետք է պայմաններ ստեղծի ու կոոպերատիվների գործունեության համար օրենսդրական դաշտը բարելավվի, հատուկ ծրագրեր մշակի, որ մարդիկ գաղափարի շուրջ համախմբվեն, ոչ թե կնիքի շուրջ: Մեր միավորումն այդ ուղղությամբ ծրագրեր էլ ունի: Եթե պահանջեն` կներկայացնենք»,- մանրամասնեց գյուղատնտեսը:
Մյուս կարևոր խնդիրը, որն առաջնահերթ է գյուղատնտեսության ոլորտում և ընդգրկված է կառավարության այս ծրագրում, ջերմոցային տնտեսությունների հարցն է, մասնավորապես, նախատեսվում է 2014-2017 թթ-ին ավելացնել ժամանակակից ջերմոցային տնտեսությունների տարածքները: Գյուղատնտեսը կարծում է, որ ջերմոցային տարածքներ ավելացնելուց պետք է առաջնահերթ նոր տեխնոլոգիաներ ներդնել, քանի որ մեր բոլոր ջերմոցները, այսպես աած հնաոճ ու տնավարի են կառուցված, որից հետո մտածել տնտեսությունների ավելացման մասին:
Բերբերյանը կարծում է`անհրաժեշտ է ստեղծել գյուղացիական բանկ, որը պետք է կառավարեն ֆերմերները և որոնց շնորհիվ գյուղացիներն այդքան մեծ տոկոսադրույքներով վարկերի տակ չենն ընկնի:
Սոնա Դավթյան
.gif)
