ԼՈՒՐԵՐ

ՄԱՐԶՊԵՏԱՐԱՆԸ ՑՐՏԱՀԱՐՈՒՄ ՉԻ ՏԵՍՆՈՒՄ

Արմավիրի մարզի Բաղրամյան համայնքի բնակիչներն անհանգստացած են, քանի որ մեկ ամիս առաջ իրենց պատկանող խաղողի այգիները ցրտահարվել են, սակայն նրանց կառավարությունը ոչնչով չի օգնելու: Բաղրամյանի բնակիչ Վարուժան Նիկողոսյանը «Ժողովուրդ»-ին տեղեկացրեց, որ իրեն պատկանող 1 հա խաղողի այգու մեծ մասը ցրտահարվել է. «Հույս ունեի, որ հողի եւ ոռոգման ջրի հարկը գոնե ինչ-որ չափով կզեղչեն, բայց չեն անում: Խաղող չենք ունենալու վաճառքի, դրա համար էլ չենք կարող անհրաժեշտ վճարումները կատարել»: Խնդրի առնչությամբ «Ժողովուրդ»-ը զրուցեց ՀՀ Արմավիրի մարզպետարանի աշխատակազմի գյուղատնտեսության եւ բնապահպանության վարչության պետ Արթուր Այվազյանի հետ, ով ասաց. «Խաղողի մասով մենք ցրտահարություն չենք արձանագրել, որովհետեւ դրա հետեւանքով պատճառված վնասը փոքր է: Արձանագրվել է միայն ծիրանենին, դեղձենին, սալորենին եւ կեռասենին»:

ԿԵՂԾ ԻՆՔՆԱԲԱՑԱՐԿ

Հունիսի 9-ին Սյունիքի մարզի Գորիս քաղաքում համայնքի ղեկավարի` սպասվելիք ընտրություններին առաջադրված թեկնածուների շուրջ կարծես թե իրավիճակ է փոխվում: Երեկ տեղեկություններ էին տարածվել, թե թեկնածուներից Արա Բուդաղյանն ինքնաբացարկի մասին դիմում է ներկայացրել: «Ժողովուրդ»-ի հետ զրույցում, սակայն, Արա Բուդաղյանն ասաց, որ ինքը Ղարաբաղում է եւ, առհասարակ, նման բան չկա: Հարցին՝ միգուցե Ղարաբաղից վերադառնա եւ նման որոշում կայացնի, Բուդաղյանն ասաց. «Սպասեք վերադառնամ ու կասեմ, բայց կրկնում եմ՝ ինքնաբացարկ չեմ հայտնել»:

ԹՈՒՆԱՎՈՐՄԱՆ ՀԵՏՔԵՐՈՎ

Մայիսի 12-ին, ՀՀ ԱՆ «Աբովյան ՔԿՀ»-ում կանանց թունավորման դեպքի շուրջ մի շարք գերատեսչություններ ստուգումներ են իրականացրել: «Ժողովուրդ»-ի տեղեկություններով՝ արդեն մի քանի օր է, ինչ դատախազությունից, ՄԻՊ գրասենյակից, հասարակական դիտորդական կազմակերպություններից, ինչպես նաեւ Արդարադատության նախարարությունից հետաքննություն են իրականացնում: Մեզ հասած տեղեկություններով՝ ՔԿՀ-ում մեկուսացված կանանց թիվը 4-ն է: Մեր աղբյուրների փոխանցմամբ՝ ՔԿՀ-ի տնօրինությունը կանանց մեկուսացրել է, քանի որ կանայք հաշվի չեն առել իրենց վատ վիճակը եւ չեն հետեւել իրենց սննդակարգին ու ինչ ասես կերել են: Իսկ տնօրինությունը հնարավոր բարդություներից խուսափելու համար նրանց մեկուսացրել է: Դեպքի կապակցությամբ նշանակվել է ծառայողական քննություն: