ԿԳ նախարար Արմեն Աշոտյանն այսօր կառավարության նիստից հետո անդրադարձավ «Ռոսիա սեգոդնյա» տեղեկատվական գործակալության գլխավոր տնօրեն, ՎԳՌՏԿ-ի (Համառուսաստանյան պետական հեռուստառադիոընկերության) փոխտնօրեն Դմիտրի Կիսելյովի այն հայտարարությանը, որ Հայաստանում ռուսաց լեզուն հետընթաց է ապրում:
Աշոտյանի խոսքով` հայ երիտասարդը պետք է 2 օտար լեզու առնվազն իմանա: Բացի այդ` ռուսերենի առաջխաղացման համար Հայաստանում ստեղծված են լավագույն պայմանները։
«Մեր երկրում այդ լեզուն դասավանդվում է երկրորդ դասարանից: Լեզվական օրենսդրության փոփոխության կարիք մենք չունենք, ՀՀ-ում թույլատրված է միջազգային կրթական ծրագրեր իրականացնել ավագ դպրոցների շրջանակում, և այդ օրենքի համաձայն՝ հնարավորություն կա ունենալ չորս անգլալեզու, ռուսալեզու դպրոց: Ուզում եմ ասել, որ ռուս գործընկերները դեռևս այդ քվոտայի և ոչ մի կետից չեն օգտվել»,- ասաց նախարարը։
Արմեն Աշոտյանի խոսքով` ռուսերենը մեզ համար անվտանգության տեսակետից ռուսական արտադրության զինտեխնիկայից օգտվելու համար բացառիկ միջոց է: Սակայն ռուսերենը պետական լեզու չէ, և չկա անհրաժեշտություն այդ լեզվին տալ սահմանադրական կարգավիճակ»։
.gif)
