ՕՐՎԱ ԽՃԱՆԿԱՐ

ՎԻՐԱՀԱՏՈՒԹՅՈՒՆԸ ՀԱՋՈՂ Է ԱՆՑԵԼ

Yerkir.am-ի հետ զրույցում, երեկ Բերդի զինվորական հոսպիտալի պետ Է.Գրիգորյանը նշել է, որ հունիսի 28-ին Տավուշի մարզի Պառավաքար գյուղում հակառակորդի արձակած գնդակից վիրավորված 12-ամյա Արմեն Բրուտյանը վիրահատվել է, մարմնից հաջողությամբ հանվել են գնդակի բեկորները, եւ վիրահատությունը լավ է անցել, երեխայի վիճակը նորմալ է:

ՀԱՄԱԳՈՒՄԱՐԸ ԿՕԳՆԻ՞

Երեկ «Դատական իշխանության անկախության արդի խնդիրները» թեմայով Գերմանիայի միջազգային իրավական համագործակցության հիմնադրամը կազմակերպել է միջազգային գիտագործնական համագումար, որին մասնակցել են Վրաստանի, Ղազախստանի, Լեհաստանի, Ուկրաինայի, Էստոնիայի, Մոլդովայի եւ Գերմանիայի դատավորների միության անդամները:

ՊԱՏՐԱՍՏՎՈՒՄ ԵՆ ԲԱՑՄԱՆԸ

Հայաստանի բնապահպանության նախարար Արամայիս Գրիգորյանը, ՀՀ Գեղարքունիքի մարզպետ Ռաֆիկ Գրիգորյանի ուղեկցությամբ հունիսի 28-ին այցելել են «Սեւան» ազգային պարկի տարածքում գտնվող հանրային լողափեր՝ հուլիսի 1-ին նախատեսված բացման նախապատրաստական աշխատանքներին ծանոթանալու։ Լողափերում անվտանգության ապահովման եւ փրկարարական աշխատանքների իրականացման պատրաստվածության շուրջ Արամայիս Գրիգորյանը քննարկում է անցկացրել տարածքային ոստիկանական, փրկարար եւ բժշկական ծառայություն իրականացնող մարմինների պատասխանատուների հետ:

ԱՌԻԹԻՑ
ՕԳՏՎՈՂՆԵՐԸ

«Հարավկովկասյան երկաթուղի»-ն, շարունակում է սահուն կերպով բարձրացնել ուղեւորների փոխադրման սակագները Երեւան-Բաթումի-Երեւան ամառային ուղեւորափոխադրումների սեզոնին: Ընդ որում, արդեն ավանդույթ է դարձել, որ ամենաթանկ տոմսերը վաճառվում են հուլիսի 10-ից օգոստոսի 20-ն ընկած ժամանակահատվածում: Ու թեեւ ընկերությունում գների բարձրացումը համարում են «աննշան», սակայն թվերը նայելիս բոլորովին այլ տպավորություն է ստեղծվում՝ պլացկարդ-վագոնի 1 տեղի նվազագույն սակագինը կազմում է 12170 դրամ, իսկ կուպե-վագոնինը՝ 18900 դրամ, ննջարան-վագոնի տոմսի արժեքը (երկտեղանի) կազմում է 28590 դրամ:

ՔԱՄՈՒ
ՀԵՏԵՎԱՆՔՆԵՐԸ

shamshyan.com-ի փոխանցմամբ՝ երեկ արտակարգ դեպք է տեղի ունեցել Երեւանում: Ժամը 20:00-ի սահմաններում Արտակարգ իրավիճակների նախարարության փրկարար ծառայության օպերատիվ կառավարման կենտրոն ահազանգ է ստացվել, որ Աթենքի փողոցում քամու հետեւանքով 3 էլեկտրասյուն շրջվել է եւ փակել փողոցը: Էլեկտրասյուների՝ գետնին տապալման հետեւանքով, բարեբախտաբար, զոհեր եւ վիրավորներ չկան:

ԸՆԴՈՒՆԵԼ Է

Վարչապետ Հովիկ Աբրահամյանը երեկ ընդունել է Հայկական բարեգործական ընդհանուր միության (ՀԲԸՄ) նախագահ Պերճ Սեդրակյանին եւ ՀԲԸՄ-ի կենտրոնական վարչության անդամ Վազգեն Յագուբյանին։ Հանդիպման ընթացքում զրուցակիցները քննարկել են ՀԲԸՄ-ի օժանդակությամբ տարբեր ոլորտներում իրագործվող ծրագրերի ընթացքը, ինչպես նաեւ անդրադարձել հետագա անելիքներին: Հովիկ Աբրահամյանը եւ Պերճ Սեդրակյանը մտքեր են փոխանակել նաեւ ազգային նպատակների շուրջ սփյուռքահայության համախմբման, հայապահպանության, կրթական եւ մի շարք այլ հարցերի վերաբերյալ: