ՀԱՅԿԱԿԱՆ ՍԵՐԻԱԼՈՒՄ ՀԱՆՑԱԳՈՐԾ ԱՖՐԻԿԱՑԻ Է ԽԱՂՈՒՄ

Դեռեւս ոստիկանապետ Ալիկ Սարգսյանի օրոք ՀՀ ոստիկանության կողմից հովանավորվող  «Եզրագծից այն կողմ»  հեռուստասերիալի դերասան Մայթքլ Դոմբիրին այսօր կասկածվում է փողերի կեղծման եւ հափշտակման  մեջ: Նրա անունը կապվում է աֆրիկական հանցավոր խմբի գործունեության հետ:
Սույն թվականի մարտի 19-ին ՀՀ ոստիկանության քրեական հետախուզության, կազմակերպված հանցավորության դեմ պայքարի գլխավոր վարչությունների, Արմավիրի մարզային վարչության Վաղարշապատի բաժնի ծառայողները համատեղ օպերատիվ միջոցառումներ իրականացնելիս բերման են ենթարկել Լիբերիայի 3 քաղաքացիների՝ Ջորջ  Թրոկոնջա Զառզառին, Ֆոստեր  Զաքիա Գեյին, Մարկ Կպառդե Դոսենին, Նիգերիայի Հանրապետության քաղաքացի Մայթքլ Նորագվորի Դոմբիրին, Կոտ Դի Վլավի Հանրապետության քաղաքացի Մամադոու Զանգառեին: Օտարերկրացիները Հայաստան են եկել 2011թ. փետրվար ամսին: Իսկ արդեն 2012թ. մարտի 16-ին համատեղ բիզնեսով զբաղվելու պատրվակով ծանոթացել են ՀՀ քաղաքացի Գեւորգ Կռպոյանի հետ: Նրանք Կռպոյանին հայտնել են, որ իբր իրենց պետությունից Հայաստան են տեղափոխել 5 մլն ԱՄՆ դոլար, որոնք ներկված են ինչ-որ սեւ ներկանյութով: Ու եթե դոլարները ներկազերծեն, դրանք կդառնան իսկական հարյուրդոլարանոցներ: Եւ այդ «հրաշագործ» ներկանյութը ձեռք բերելու համար գումար է անհրաժեշտ:
Եւ այսպես, աֆրիկացիները մարտի 16-ին Կռպոյանից վերցրել են 4 հազար ԱՄՆ դոլար գումար իբր թե իրենց երկրից բերած փողերը ներկազերծելու նպատակով: Խարդախները այդ 4000-ից 2100 դոլարը չպարզված նյութով ներկել են, նմանեցրել սեւ ստվարաթղթերով պատրաստված 100 ԱՄՆ դոլարի: Դոլարները հավաքել են համապատասխան կապոցներով եւ դրել իրենց կողմից գնված չհրկիզվող պահարանի մեջ: Ու մարտի 18-ին, Երեւանին հարակից Թաիրով գյուղում գտնվող ռեստորանային համալիրի մոտ հանդիպելով Գեւորգին, վստահություն ներշնչելու համար ցույց են տվել պահարանի պարունակությունը: Եւ Գեւորգ Կռպոյանին էլ ավելի գայթակղելու համար նրանից վերցված պարտք գումարից 2100 ԱՄՆ դոլարը վերադարձրել են Կռպոյանին` խնդրելով եւս 100.000 ԱՄՆ դոլար իբր քիմիական նյութեր ձեռք բերելու եւ մնացած մեծ թվով թղթադրամները լվանալու համար: Սակայն վերջինս հրաժարվել է համագործակցել աֆրիկացիների հետ: Այսպիսով` սեւամորթները Գեւորգ Կռպոյանից խաբեությամբ հափշտակել են ընդհանուր առմամբ 1900 դոլար եւ այդ օրվանից հայտնվել իրավապահների ուշադրության կենտրոնում:
Այս առիթով ոստիկանությունում հարուցվել է քրեական գործ, որի շրջանակներում ՀՀ քրեական օրենսգրքի 178 հոդածի 2-րդ մասի 1-ին եւ 2-րդ կետերով (մի խումբ անձանց կողմից նախնական համաձայնությամբ խոշոր չափերի հասնող խարդախություն) մեղադրանք է առաջադրվել Ֆոստեր Գեյին, Թրոկոնջա Զառզառին եւ Մարկ Դոսենին: Աֆրիկացիներին սպասվում է 4-8 տարվա ազատազրկում: Իսկ հանցագործությանը մասնակից մյուս «սեւերի»` Մայթքլ Դոմբիրիի ու Մամադոու Զանգառեիի նկատմամբ խափանման միջոց է ընտրվել երկրից չբացակայելու մասին ստորագրությունը:
«Ժողովուրդ»-ը պարզեց, որ Մայթքլ Դոմբիրին նկարահանվում էր «Արմենիա» հեռուստաընկերությամբ հեռարձակվող «Եզրագծից այն կողմ» սերիալում: Ֆիլմի օպերատորի հավաստմամբ՝ Մայթքլը զբաղեցրել է երկրորդական դեր, հանդես եկել աֆրիկացի բիզնեսմենի դերում: Ինչպես պարզաբանվեց, «սեւին» ընտրել են պատահականության սկզբունքով՝ փողոցային հարցման արդյունքում:
Փորձեցինք կապ հաստատել նաեւ գործով տուժող Գեւորգ Կռպոյանի հետ: Սակայն մի քանի օր  շարունակվող փնտրտուքներն ապարդյուն անցան: Նա զանգահարեց «Ժողովուրդ»-ի խմբագրություն եւ խնդրեց, որ «իրենից հնարավորինս հեռու մնանք»: Քաղաքացին չցանկացավ որեւէ բան պատմել, թե ինչպես է հայտնվել աֆրիկացիների թակարդում եւ խաբվել:
Այս պատմության մեջ մտահոգիչը ոչ միայն այն է, որ հեռավոր Աֆրիկայից ինչ-որ խումբ է եկել Հայաստան ու կարողացել հեշտությամբ խաբել ՀՀ քաղաքացիներին, այլ այն, որ Հայաստանի Հանրապետությունում հեռուստասերիալի դերասանին «վայ սցենարիստները» գտել են փողոցային քասթինգի արդյունքում, նա էլ «հանցագործ է դուրս եկել»: Ու հավանաբար սա է պատճառը, որ այսօր Երեւանի թատրոնի եւ կինոյի պետական ինստիտուտի շատ շրջանավարտներ մնում են անգործ, բազմաթիվ դերասաններ հեռանում են մեր երկրից` հաճախ նվաճելով բարձունքներ օտարության մեջ:
Ի դեպ, ըստ շրջանառվող լուրերի՝ կեղծարարների զեղծարարություններից տուժել են ոչ միայն շարքային քաղաքացիները, այլեւ մի շարք չինովնիկներ, որոնք «համեստաբար» փորձում են հասարակության  աչքից հեռու մնալ: ՀՀ ոստիկանությունն էլ համապատասխան ցուցմունքներ չի կարողանում ստանալ` «մեծ շնաձկներին» գործում որպես վկա ներգրավելու համար: Ամենայն հավանականությամբ հենց այս պատճառով էլ առաջիկայում կկարճվի «աֆրիկացիների գործը»: