24 փետրվարի, 2015 թ., Երևան. Beeline-ը հայտարարում է բջջային կապի հաշիվների վճարման և համարների արգելափակման ժամկետների փոփոխության մասին հետվճարային հաշվարկային համակարգի բաժանորդների համար:
«2015թ.–ի մարտից Beeline-ը հետվճարային հաշվարկային համակարգի բաժանորդների հաշիվները կներկայացնի ավելի շուտ` գրեթե ամսվա սկզբին: Այս ամենն արվում է այն նպատակով, որպեսզի մենք հաշիվների վճարման օրերին կարողանանք նվազագույնի հասցնել հերթերի թիվը վաճառքի և սպասարկման գրասենյակներում։ Նախորդ ամսվա համար վճարման հաշիվը նախապես ստանալով, հետվճարային հաշվարկային համակարգի բաժանորդները կկարողանան ավելի շուտ մարել դրանք, ինչն ավելի արագ և հարմար կդարձնի սպասարկումը մեր գրասենյակներում», – նշեց Հայաստանում Beeline-ի Գլխավոր տնօրեն Անդրեյ Պյատախինը:
2015 թ. մարտ ամսից սկսած բջջային ծառայությունների մատուցման դիմաց նախորդ ամսվա հաշիվը կներկայացվի ընթացիկ ամսվա 2-ից սկսած: Այդ հաշիվն ենթակա է վճարման մինչև ընթացիկ ամսվա 15-ը: Եթե այդ ընթացքում վճարում չի իրականացվում, ապա տվյալ ամսվա 19-ից ելքային զանգերն արգելափակվում են: Մինչև տվյալ ամսվա 22-ը հաշիվը չմարելու դեպքում կապն ամբողջովին արգելափակվում է, իսկ 3 ամսվա ընթացքում չվճարելու դեպքում բաժանորդի հետ պայմանագիրը լուծարվում է: Հաշիվը վճարելու դեպքում հեռախոսահամարն ապաարգելափակվում է։
Beeline-ի ծառայությունների դիմաց հաշիվների վճարման ժամկետների մասին լրացուցիչ տեղեկատվություն կարող եք ստանալ Beeline վաճառքի և սպասարկման գրասենյակներում, զանգահարելով 0611 անվճար շուրջօրյա հեռախոսահամարին կամ այցելելով www.beeline.am կայք:
.gif)
