«Ժամանակակից աշխարհում մարդու իրավունքները» թեմայով ամենամյա տարեկան զեկույցն է հրապարակել միջազգային Amnesty International կազմակերպությունը:
Զեկույցում անդրադառնալով Հայաստանում մարդու իրավունքներին՝ միջազգային կազմակերպության փորձագետները հակիրճ նկարագրում են ՀՀ-ում տիրող ընդհանուր իրավիճակը՝ շեշտադրելով հայ-ադրբեջանական սահմանի երկայնքով գրանցված զինադադարի խախտման դեպքերը ու Եվրասիական տնտեսական միությանն անդամակցելու փաստը:
Հավաքներ անցկացնելու ազատության վերաբերյալ բաժնում նշվում է մեկ տարվա ընթացքում մի քանի անգամ ուժի կիրառմամբ խաղաղ ցույցերը ցրելու դեպքերը:
Կանանց իրավունքները բաժնում անդրադարձ է արվել «Կանանց ռեսուրսային կենտրոն» հասարակական կազմակերպության և կանանց իրավունքների այլ պաշտպանների հասցեին հնչած սպառնալիքներին, ինչպես նաև 2013-ին «Կանանց ռեսուրսային կենտրոնից» հաշվեհարդար տեսնելու սպառնալիքներին, երբ կազմակերպությունը կոչ է արել ընդունել գենդերային հավասարության մասին օրենքը: Շեշտվում է, որ տարեվերջի դրությամբ սույն դեպքերից և ոչ մեկի ուղղությամբ արդյունավետ քննություն չի անցկացվել:
Անդրադառնալով Հայաստանում LGBTI անձանց իրավունքներին՝ նշվում է, որ LGBTI խմբի հանդեպ խտրականության բոլոր ձևերն արգելող օրենքի ընդունումը կասեցվել է , իսկ այն դրույթները, որոնցում հատուկ ընդգծված էր սեռական կողմնորոշման հիմքով խտրականության արգելքը, ԱԺ օրինագծից հանվել են:
Խոշտանգումներն ու տանջանքի այլ ձևեր բաժնում անդրադաանում են ընդդիմադիր Շանթ Հարությունյանի ձերբակալությանը: Նաև նշվում է, որ տեղի իրավապաշտպանները չեն դադարել մտահոգություն հայտնել ոստիկանությունում ծեծերի ու դաժան վերաբերմունքի մասին ստացվող բազմաթիվ տեղեկությունների կապակցությամբ:
.gif)
