Ադրբեջանի արտակարգ իրավիճակների նախարարության Բաքվի Բիլաջարի ավանում գտնվող զորամասում մահվան դեպք է տեղի ունեցել: Ինչպես հաղորդում է «Արմենպրես»-ը` վկայակոչելով «Ազադլըգ» թերթը, զորամասի 25-ամյա զինծառայող Թափդըղ Ալիզամին օղլու Բաբաշովը շենքի 4-րդ հարկից ընկել եւ մարմնական վնասվածքներ է ստացել:
Ծանր վնասվածքներով նա տեղափոխվել է Բաքվի թիվ 1 կլինիկական հիվանդանոց: Բժիշկներին նրա կյանքը փրկել չի հաջողվել: Սակայն, զինվորի մայրը հայտարարել է, որ որդին մահացել է ոչ ընկնելու հետեւանքով, այլ նրան սպանել են: Մի այլ հարազատ էլ հայտնել է, որ Թափդըղի թեւերին պարանի հետքեր են եղել:
Միջադեպը տեղի է ունեցել մայիսի 22ի գիշերվա ժամերին: Ադրբեջանի ԱԻՆը եւ ՊՆը դեռեւս չեն արձագանքել միջադեպին: Թեեւ Ադրբեջանը շարունակում է սեփական զինուժում գրանցված մահվան դեպքերի ու արտակարգ պատահարների մասին տեղեկությունները թաքցնելու քաղաքականությունը, այդուհանդերձ, ՀՀ ՊՆ եւ ԼՂՀ ՊԲ կողմից սեփական միջոցներով ձեռք բերված տեղեկությունների համաձայն` տարվա սկզբից մինչ այժմ ադրբեջանական բանակի կորուստը կազմել է առնվազը 69 զինծառայող եւ 31 ից ավելի վիրավոր:
.gif)
