Այսօր Երևանի Կոմիտասի անվան պետական կոնսերվատորիայում (ԵՊԿ) տեղի ունեցով գիտխորհրդի նիստ, որի ընթացքում «Մասնագիտական կրթության որակի ապահովման ազգային կենտրոն» հիմնադրամի (ՈԱԱԿ) տնօրեն Ռուբեն Թոփչյանը և Հավատարմագրման հանձնաժողովի քարտուղար Անահիտ Ութմազյանը հանդիսավոր կերպով բուհին հանձնեցին ինստիտուցիոնալ հավատարմագրման վկայականը:
Ռուբեն Թոփչյանը, շնորհավորելով բուհին, նշեց, որ հավատարմագրում ստանալը բուհի համար որակի նոր մշակույթի սկիզբն է: Նա վստահություն հայտնեց, որ 4 տարի անց ԵՊԿ-ն, որակի ապահովման շարունակական գործընթացների և փորձագետների մատնանշած թերությունների վերացման ծրագրի իրագործման արդյունքում, հավատարմագրման կդիմի արդեն նոր ձեռքբերումներով, ռեսուրսներով ու հաղթահարված մարտահրավերներով:
Պարոն Թոփչյանը նշեց նաև, որ տարբեր ժամկետներով շնորհված հավատարմագրումները չպետք է ընդունել որպես այս կամ այն հաստատության առավելության գնահատական. «Չորս տարվա ժամկետը իրականում երկու երկամյա փուլեր են. երկու տարի հետո բուհը ներկայացնելու է ներքին ինքնագնահատման արդյունքները, իսկ ժամկետի ավարտին մասնակցելու է հավատարմագրման նոր շրջափուլի»:
ԵՊԿ ռեկտոր Շահեն Շահինյանը, կարևորելով հավատարմագրում ստանալու հանգամանքը, նշեց, որ շուրջ երեք տարի ծավալուն աշխատանքներ են իրականացրել և երկար ճանապարհ են անցել նպատակին հասնելու համար:
«Ինքներս ենք շահագրգռված արդյունավետ կրթական գործընթաց իրականացնելու մեջ»,- ասաց Շահինյանը: ԵՊԿ ռեկտորը նաև ՈԱԱԿ-ին շնորհակալություն հայտնեց բուհին ցուցաբերած աջակցության և խորհրդատվությունների համար:
Հիշեցնենք, որ ՈԱԱԿ հավատարմագրման հանձնաժողովի ապրիլի 11-ի որոշմամբ ԵՊԿ-ին շնորհվել է 4 տարի ժամկետով ինստիտուցիոնալ հավատարմագրում:
.gif)
