Արտակ Շաբոյանը իր բաջանաղի միջոցով ՀԷՑ-ում գումար աշխատելուց բացի նաև այլ բիզնեսներ ունի՞

Ինչպես հայտնի է, Արտակ Շաբոյանի կողմից ղեկավարվող Տնտեսական մրցակցության պետական պաշտպանության հանձնաժողովը օրենքի ուժով լայն լիազորություններ ունի: Բայց արդյո՞ք այդ լիազորություններն օգտագործվում են բացառապես ի շահ պետության եւ հասարակության: Պարզվում է` երբեմն այդպես չի լինում: Համենայնդեպս կոնկրետ մի քաղաքացի հստակ դժգոհություն է հայտնում Շաբոյաի գործունեությունից:

Բայց ամեն ինչի մասին՝ հերթով

Երեւանի գողտրիկ անկյուններից մեկում՝ Ջրվեժ թաղամասում գտնվող «Արմենիա» ռեստորանը սիրելի վայր է երեւանցիների եւ Երեւան ժամանած հյուրերի համար: Վերջերս մամուլը գրեց, որ նշված օբյեկտը որոշակի առնչություն ունի Արտակ Շաբոյանի հետ: Ավելին, Շաբոյանի գլխավորած հանձնաժողովի աշխատակիցների համար համարվում է պարտադիր այցելության սննդի օբյեկտ: Ասել է թե՝ շեֆին հաճոյանալու համար նրան պատկանող ռեստորան են հաճախում ոչ միայն Շաբոյանի ենթակաները, այլ նաեւ այն տնտեսվարողները, որոնց նկատմամբ Շաբոյանի հանձնաժողովը վարույթ է հարուցել կամ պատրաստվում է հարուցել: Ռեստորան հաճախելը եւ այնտեղ մի կլորիկ գումար ծախսելը գուցե մեղմի՞ Շաբոյանի բարկությունը, եւ նա ների՞ տնտեսվարողներին՝ կարճելով հարուցված վարույթը: Ո՞վ գիտե: Սակայն Շաբոանի խոսնակ Գայանե Սահակյանը հերքում է ռեստորանի մասին լուրը՝ հայտնելով, որ այդ մասին Շաբոյանն ինքն էլ է առիթ ունեցել հերքելու:

«Ակտի տուր»-ը՝ Շաբոյանի սիրելի՞

Լրատվամիջոցներում արդեն հրապարակվել է «Մարաթուկ հոլդինգ» ՍՊԸ-ի հեղինակած հայտարարությունն այն մասին, որ Արտակ Շաբոյանն իր գլխավորած հանձնաժողովով արշավ է սկսել «Մարաթուկ Հոլդինգ» ՍՊԸ-ի նկատմամբ: Սկզբում անհասկանալի էր, թե Ա. Շաբոյանն ինչո՞ւ պետք է «ընկնի» «Մարաթուկ Հոլդինգ» ՍՊԸ-ի հետեւից: Սակայն փոքրիկ լրագրողական ուսումնասիրության արդյունքում պարզվեց, որ նշված տուրիստական ընկերությունը մի խոշոր մրցակից ունի շուկայում` ի դեմս «Ակտի տուր» ՍՊԸ-ի, որը ինչպես եւ «Մարաթուկ Հոլդինգը», ոչ կանոնավոր չվերթներ է իրականացնում Երեւան-Հերակլիոն (Կրետե կղզի)-Երեւան ուղղությամբ: Չի բացառվում, որ հենց այս «Ակտիտուր» ընկերությունն է որեւէ կերպ առնչվում Շաբոյանին:

Ինչո՞ւ է այս տեսակետը ձևավորվել, բացատրենք. «Մարաթուկ Հոլդինգի» «ոչնչացման» ծրագիրը սկսվեց մի տոմսի պատմությունից: ՀՀ քաղաքացիներից մեկը տոմս է գնել «Լեւոն Թրեւլ» ընկերությունից՝ «Մարաթուկ Հոլդինգի» կողմից իրականացվող չվերթի ուղղությամբ: «Լեւոն Թրեւլի» աշխատակիցը պարզաբանել է գնորդին, որ նշված տոմսը վերադարձման ենթակա չէ: Այսինքն, փոշմանել չկա: Քաղաքացին համաձայնել է առաջարկված պայմանի հետ եւ գնել տոմսը, սակայն հաջորդ օրը վերադարձի պահանջելով մտել է «Լեւոն Թրեւլ»՝ պահանջելով տոմսի արժեքը: Ու թեեւ այդ ընկերությունում բացատրել են, որ նախապես զգուշացված էր տոմսի վերադարձի հնարավորության մասին, այնուամենայնիվ, այդ քաղաքացին բողոք է ներկայացրել «Պաշտպանված եւ իրազեկ սպառող» հկ-ին, որն էլ այդ մասին բարձարձայնել է մամուլում: Քաղաքացին պատճառաբանել է, թե գոյություն չունեցող չվերթի տոմս է վաճառվել իրեն:

Մինչդեռ նշված չվերթը հունիսի 30-ին կայացավ:

Առանց վարույթը հաստատելու

Բայց պարզվում է, որ այդ քաղաքացին «Ակտի տուր» տուրիստական ընկերության հետ ջերմ ընկերական հարաբերությունների մեջ գտնվող Արամ Շահինյանն է:

Իսկ մամուլում բարձրաձայնելն էլ ուներ իր հեռուն գնացող նպատակները: Մասնավորապես, մամուլի այդ հրապարակումները սկսեցին հետաքրքրել ՏՄՊՊՀ-ին եւ նրա սկզբունքային ղեկավար Արտակ Շաբոյանին: Վերջինս շտապեց վարույթ հարուցել «Մարաթուկ» ՍՊԸ-ի նկատմամբ: Թվում է, թե պաշտոնյան իր պարտականություններն է կատարել՝ ընդ որում՝ բարեխղճորեն: Բայց իրականում պարզվում է` այս նույն օրը, բացի «Մարաթուկ Հոլդինգ»-ից, վարույթ է հարուցվել նաեւ բազմաթիվ այլ տնտեսվարող սուբլեկտների նկատմամբ: Սակայն, ըստ երեւույթին, հենց Արտակ Շաբոյանի հանձնարարությամբ լրատվամիջոցներին ուղարկվել էր միայն «Մարաթուկ Հոլդինգ» ՍՊԸ-ն վերաբերող մասը:

Մեկ ամբողջ օր հանձնաժողովի աշխատակից Գնելը, թերեւս շեֆի հանձնարարությամբ, հերոսաբար ելույթ էր ունենում բոլոր լրատվամիջոցներով եւ հայտարարում, թե «Մարաթուկ Հոլդինգ»-ի նկատմամբ վարույթ է հարուցվել, քանի որ գովազդային բուկլետի վրա Կրետե կղզին չէ պատկերված:

Ու թեեւ «Մարաթուկ Հոլդինգը» հրապարակավ բացատրեց, որ իր բուկլետի վրա պատկերված Կրետե կղզու տեսարանը վերցրել էր համացանցից՝ Գուգլ-ի որոնման համակարգով, այնուամենայնիվ, հանձնաժողովը ոչ միայն չկարճեց հարուցված վարույթը, այլեւ նրա ղեկավար Շաբոյանն անձամբ, առանց սպասելու վարույթի ավարտին, շտապեց Ծաղկաձորում հավաքված լրատվամիջոցներին հունիսի 21-ին հայտնել, թե տուրիստական կազմակերպությունները փաթեթային էժան առաջարկնր են գովազդում, իսկ երբ քաղաքացին այցելում է իրենց գրսենյակներ, ասում են, թե էժան փաթեթներն արդեն սպառվել են եւ «ստիպում» օգտվել թանկ փաթեթից: «Ավելին, բուկլետներում տեղադրում են գեղեցիկ վայրերի, քաղաքների լուսակարներ եւ միայն տեղ հասնելուց է անձը, քաղաքացին պարզում, որ րեն խաբել են և նման հնարավորություն ինքը չի ունենալու: Օրինակ «Մարաթուկ» ընկերության նկատմամբ հանձնաժողովը վարչական վարույթ է հարուցել, վերջինս մոլորեցրել է քաղաքացիներին՝ բուկլետներին ներառելով իբր Կրետե կղզու լուսանկարը, որն իրականությանը չի համապատասխանել»,- հայտարարել է Շաբոյանը: Նկատեցի՞ք՝ Շաբոյանը դեռ վարույթը չավարտած, արդեն վստահ պնդում է, որ «Մարաթուկ» ընկերությունը մոլորեցրել է քաղաքացիներին:

Հավելենք, որ «Մարաթուկ հոլդինգն» արդեն հրապարակավ հայտնել է իր կասկածներն այն մասին, որ Շաբոյանը կոնկրետ շահագրգռվածություն ունի իրենց վարկաբեկելու հարցում: Իսկ թե ինչ կշահի դրանից, դժվար է ասել. տուրիստական փաթեթների տոմսե՞ր, նոր բիզնե՞ս՝ ի դեմս տուրիստական ընկերության, թե՞… Ամեն դեպքում տխուր է, որ Հայաստանում պետական պաշտոնը ազատ կարելի է ծառայեցնել սեփական շահերին ու մնալ անպատիժ, իսկ դրա օրիակները շատ են:

Armlur.am-ը փորձեց այս առիթով պարզաբանումներ ստանալ ՏՄՊՊՀ նախագահ Արտակ Շաբոյանից: Նրա խոսնակ Գայանե Սահակյանը հերքեց բոլոր լուրերը՝ ասելով, որ իրենք գործել են օրինականության սահմաններում:

Մեզ մնում է սպասել զարգացումներին:

Արփինե Թովմասյան