ՆՄԱՆՆԵՐԸ ԽԱՅՏԱՌԱԿՈՒՄ ԵՆ ՀԱՄԱԿԱՐԳԸ

Հուլիսի 13-ին հայտնի դարձավ, որ Երեւանի Բաղրամյան պողոտայում հունիսի 23-ին էլեկտրաէներգիայի սակագնի դեմ թանկացման բողոքի ակցիան ցրելու ընթացքում գործադրված բռնությունների համար ոստիկանության մի շարք բարձրաստիճան պաշտոնյաներ նկատողություն են ստացել: Այդ թվում` ոստիկանության Երեւան քաղաքի վարչության պետի օպերատիվ գծով տեղակալ, ոստիկանության գնդապետ Արթուր Մեհրաբյանը, որի անունը առաջին անգամ չէ, որ հայտնվում է մամուլի էջերում:

Նշենք, որ Արթուր Մեհրաբյանը նշված օրը խախտել էր ՀՀ ոստիկանության կարգապահական կանոնագիրքը հաստատելու մասին ՀՀ օրենքի 10-րդ հոդվածի 4-րդ մասի թ կետի պահանջը: Ոստիկանության ծառայողի էթիկայի կանոնները խախտելու, զսպվածություն չցուցաբերելու եւ ծառայության ընթացքում վայելուչ ու քաղաքակիրթ վարքագիծ չդրսեւորելու համար, համաձայն «Ոստիկանությունում ծառայության մասին» ՀՀ օրենքի 42-րդ հոդվածի 1-ին մասի 1-ին կետի, 43-րդ հոդվածի 6-րդ մասի, «ՀՀ ոստիկանության կարգապահական կանոնագիրքը հաստատելու մասին» ՀՀ օրենքի` Ա. Մեհրաբյանին հայտարարվել է նկատողություն:
Իսկ ով է Արթուր Մեհրաբյանը, որի անունը ժամանակ առ ժամանակ հայտնվում է մամուլի ուշադրության կենտրոնում` տարբեր աղմկահարույց պատմությունների շրջանակում:
Եվ այսպես, Մեհրաբյանը հանրության ուշադրության կենտրոնում առաջին անգամ հայտնվեց 2009 թվականին, երբ Կենտրոնի ոստիկանապետն էր: Բանն այն է, որ 2008 թվականի դեկտեմբերին «Մոխիտո» կարաոկե-բարում դանակահարություն էր կատարվել, որը գրանցվել էր, սակայն ոստիկանների ոչ օպերատիվ գործողությունների արդյունքում չէին կարողացել պարզել, թե ովքեր են միջադեպի մեղավորները: Իրականում այդ հանցագործության մեջ կասկածվողներից մեկը եղել էր նաեւ Կենտրոնի դատախազի որդին, սակայն ոստիկանությունը այդ վարկածը չէր ստուգել: Հենց այդ «վրիպման» արդյունքում էլ Աղվան Հովսեփյանի հետ բավականին մտերիմ հարաբերություններ ունեցող Կենտրոնի ոստիկանապետ, գնդապետ Արթուր Մեհրաբյանին, մականունը` Ալեն Դելոն, փոխարինեց Երեւանի ներկայիս ոստիկանապետ Աշոտ Կարապեյանը: Ի դեպ, վերջինիս` աշխատանքից ազատման հրամանն էլ տվել էր ՀՀ նախկին ոստիկանապետ Ալիկ Սարգսյանը:
Ինչեւէ: Այս պաշտոնանկությունից հետո 2011 թվականին Մեհրաբյանին նշանակեցին Արաբկիր վարչական շրջանի ոստիկանապետ, որտեղ, սակայն, նա երկար չպաշտոնավարեց: Դեռեւս այն ժամանակ մամուլում տեղեկություններ տարածվեցին, որ Մեհրաբյանի հեռացումը պայմանավորված է եղել Արաբկիր համայնքում տեղի ունեցած մի շարք չբացահայտված հանցագործություններով, որոնք միտումնավոր կերպով կոծկվել են: Մասնավորապես կոծկված գործերից մեկը Արաբկիր վարչական շրջանի Կոմիտասի պողոտայի թիվ 30 շենքի 6-րդ բնակարանում սպանված Լուսինե Ղազարյանի դեպքն էր: Ինչի արդյունքում էլ այս անգամ Վլադիմիր Գասպարյանի հրամանով 2012թ դեկտեմբերի 7-ին Արթուր Մեհրաբյանն ազատվեց աշխատանքից:
Ի դեպ, Արաբկիր համայնքում տեղի ունեցած եւ չբացահայտված հանցագործություններն էլ ուղարկվել էին հատուկ քննչական ծառայություն` նոր քննություն սկսելու համար: Իսկ, ահա, Մեհրաբյանով զբաղվում էր ոստիկանության ներքին անվտանգության վարչությունը:
Արդեն երկու նախադեպ կար, եւ թվում էր, թե Արթուր Մեհրաբյանի համար ոստիկանության համակարգ մուտք գործելու ճանապարհը պետք է որ փակված լիներ, սակայն ինչպես պարզվեց` դա այդպես չէր:
Նրա մասնագիտական գործունեության ընթացքում արձանագրված այս աղմկահարույց դեպքերը որեւէ կերպ չխանգարեցին, որ կարճ ժամանակ անց Արթուր Մեհրաբյանը նշանակվի Երեւան քաղաքի վարչության շտաբի պետ: «Ժողովուրդ»-ի հետ զրույցում դեռեւս 2012 թվականին ոստիկանության ներքին անվտանգության վարչության պետ Արմեն Հակոբյանը՝ պարզաբանելով, թե ինչու նա կրկին շտաբի պետ նշանակվեց, ասել էր. «Քննությունն ավարտվել է, գործն ուղարկել ենք հատուկ քննչական ծառայություն: Մնացածը ՀՔԾ-ն կորոշի՝ մեղավոր է, թե ոչ»:
Ըստ էության ՀՔԾ-ն այդպես էլ հանցագործությունների կոծկման հետ առնչություն ունեցող եւ այլ վրիպումներ թույլ տված Արթուր Մեհրաբյանին մեղավոր չճանաչեց: Եթե այդպես լիներ, ապա Արթուր Մեհրաբյանը հունիսի 23-ին չէր լինի Բաղրամյան պողոտայում, հերթական անգամ չէր խախտի ոստիկանության ծառայողի էթիկայի կանոններն ու աչքի չէր ընկնի անվայելուչ պահվածքով: Փաստորեն, այսքանից հետո Արթուր Մեհրաբյանը շարունակում է հանգիստ աշխատել ոստիկանության համակարգում` զբաղեցնելով բարձր եւ պատասխանատու պաշտոններ: Հետաքրքիր է՝ ով է նրա «հովանավորը», որի շնորհիվ քրեական պատասխանատվություն ենթադրող գործունեության մեջ կասկածվող այս ոստիկանը շարունակում է իր անխափան վերելքը կարիերայի աստիճաններով: Նման ոստիկանների անցած ուղին եւ ներկայումս զբաղեցրած պաշտոնները տեսնելով` դժվար է անսալ ոստիկանին վստահելու` ՀՀ ոստիկանապետ Վլադիմիր Գասպարյանի կոչերին, որքան էլ դրանք անկեղծ լինեն, եւ որքան էլ հայտարարվի ոստիկանությունում իրականացվող բարեփոխումների մասին: Ի վերջո, եթե ՀՀ ոստիկանապետը ցանկանում է, որ համակարգի նկատմամբ ձեւավորվի հանրային վստահություն եւ հարգանք, ապա պետք է համակարգը մաքրի նման վարկաբեկված կադրերից:
Այս առումով տեղին է հիշել 2011թ ոստիկանության կոլեգիայի նիստի ժամանակ Սերժ Սարգսյանի արած հայտարարությունը: Վերջինս անդրադառնալով ոստիկանությունում առկա բացթողումներին՝ ասել էր. «Եթե դուք համակարգի նկատմամբ լուրջ վերաբերմունք ունեք, ինչում ես վստահ եմ, համակարգի պատիվը համարում եք ձեր պատիվը, ինքներդ պետք է անձնական վիրավորանք զգաք եւ ինքներդ առաջինը պետք է գայիք ու այդ բարձր պաշտոն ունեցող ոստիկանին ասեիք՝ ա՛յ անբարոյական, ինչո՞ւ ես խայտառակում մեր համակարգը»:

ՔՆԱՐ ՄԱՆՈՒԿՅԱՆ

 
ՈՎ Է ԵՂԵԼ ԱԿԱՆԱՏԵՍԸ
Երեկ՝ հուլիսի 14-ին, Տիգրանյան 5 հասցեի բակում հնչել էին կրակոցներ, ինչի արդյունքում սպանվեց քրեական հեղինակություն համարվող 35-ամյա Արթուր Հովհաննիսյանը, ով հայտնի էր Չուգուն մականվամբ:
Նախնական տվյալներով՝ կրակոցներն արձակվել են, երբ Արթուր Հովհաննիսյանը, դուրս գալով շենքի մուտքից, գնացել է դեպի հարեւանությամբ կայանված իր ավտոմեքենան: Ի դեպ, ըստ շրջանառվող լուրերի՝ սպանությունը տեղի է ունեցել հենց Արթուրի կնոջ եւ դստեր աչքի առաջ: Սակայն կա եւս մի ականատես: «Ժողովուրդ»-ի տեղեկություններով՝ սպանված Արթուրի կնոջ եղբայրը եղել է հենց մեքենայի մեջ եւ, ամենայն հավանականությամբ, տեսել է՝ ովքեր են եղել իր փեսային կրակողները:
Դեպքի վայրի զննությամբ հայտնաբերվել է 4 պարկուճ, 1 գնդակ: Ըստ շրջանառվող լուրերի՝ Արթուր Հովհաննիսյանը օրեր առաջ կոնֆլիկտ է ունեցել ԱԺ ԲՀԿ խմբակցության անդամ Աբրահամ Մանուկյանի որդու` Արթուր Մանուկյանի հետ: Ի դեպ, վերջինս Երեւանի նախկին ոստիկանապետ Ներսիկ Նազարյանի փեսան է: Փորձեցինք տեղեկությունը պարզել Աբրահամ Մանուկյանից, սակայն վերջինս վստահեցրեց, որ իր որդին այս ամենի հետ կապ չունի. «Հեյրուրանք է 100 տոկոս, բան եմ ասում, չկա նման բան»:

ՆՈՐ ՍՏՈՒԳՈՒՄՆԵՐ ԿՈՄԲԻՆԱՏՈՒՄ
«Զանգեզուրի պղնձամոլիբդենային կոմբինատից» դիզվառելիքի գողության գործով կրքերը չեն հանդարտվում: «Ժողովուրդ»-ի տեղեկություններով՝ այս դեպքից հետո կոմբինատում հերթական ստուգումներն են սկսվել, ու չի բացառվում, որ առաջիկայում հերթական ձերբակալության մասին լսենք:
«Ժողովուրդ»-ը գրել էր, որ մայիսի 26-ին կոմբինատի աշխատակիցներից Կարեն Ենդիգարյանը եւ Գոռը, կոմբինատի փաստաթղթեր կեղծելով, 3 մլն դրամի դիզվառելիք են գողացել: Ու այս գործի շրջանակներում աշխատանքից ազատվել է Կապանի ոստիկանապետի տեղակալ Հայկ Հովհաննիսյանը, քանի որ ըստ տեղեկությունների՝ դիզվառելիքի գողության գործով անցնող վկաների նկատմամբ ճնշում էր գործադրել` ստիպելով նրանց, որ այս գործով կոմբինատի ավտոկայանատեղիի պատասխանատու Կարեն Ենդիգարյանի անունը չտան, այլ հայտնեն նրա աշխատակիցներից Գոռի անունը: Ինչեւէ:«Ժողովուրդ»-ին հաջողվել է պարզել, որ օրերս Կարեն Ենդիգարյանի պաշտպանը միջնորդություն է ներկայացրել դատարան, որպեսզի նրան 80.000 դոլար գրավի դիմաց ազատ արձակեն, սակայն դատարանը մերժել է միջնորդությունը, եւ Կարեն Ենդիգարյանի կալանքը եւս երկու ամսով երկարաձգվել է:

ԻՆՉՈ՞Ւ ՏԵՂԱՓՈԽԵՑԻՆ
Քրեակատարողական հիմնարկների պետերի տեղափոխությունները շարունակվում են: Երեկ «Ժողովուրդ»-ին հայտնի դարձավ, որ Արթիկի ՔԿՀ պետ Գեւորգ Մկրտչյանը ազատվել է աշխատանքից եւ նշանակվել Վանաձորի ՔԿՀ պետ, իսկ, ահա, Վանաձորի ՔԿՀ պետ Արտյոմ Մխոյանն էլ նշանակվել է Արթիկի ՔԿՀ պետ: Թե ինչով է պայմանավորված այս տեղափոխությունը, հայտնի չէ:

 
ՍՊԱՆՎԱԾԸ ՀԱՐՈՒՍՏ ԳՈՐԾԱՐԱՐ ԷՐ
Արդեն տեղեկացրել ենք, որ հուլիսի 12-ին՝ ժամը 19:00-ի սահմաններում, Երեւանում, Օհանովի փողոցի բնակարաններից մեկում հայտնաբերվել է Ռոստովի մարզի Ազով քաղաքի 46-ամյա բնակիչ Համլետ Ասատրյանի դին՝ պարանոցի շրջանում հրազենային վնասվածքով:
168.am-ի տեղեկություններով՝ Համլետ Ասատրյանը մեծահարուստ գործարար էր, ծնունդով Մարտունիից, ամուսնացած էր, ուներ մեկ աղջիկ եւ մեկ տղա: Իր բիզնեսները (ռեստորաններ, գազալցակայաններ, ձկան խավիարի վաճառք) կենտրոնացած էին հիմնականում Ռոստովում, եւ նա Հայաստանում շատ քիչ էր լինում: Նա Երեւան էր գալիս միայն հարազատների, ընկերների հետ կապված առիթներին՝ կնունք, հարսանիք, ծնունդ: Աղբյուրի փոխանցմամբ՝ նա մասնակցել է նաեւ ՀՀԿ-ական պատգամավոր Սամվել Ալեքսանյանի երեխաների մկրտության արարողությանը:

ՊԱՀԱՆՋՈՒՄ ԵՆ
«Ոչ թալանին» նախաձեռնության անդամները երեկ երթով գնացել են դեպի դատախազություն եւ հանձնել նամակ, որով պահանջում են քրեական պատասխանատվության ենթարկել հունիսի 23-ին ապօրինի գործունեություն իրականացրած ոստիկանական համազգեստով եւ քաղաքացիական հագուստով իրավապահներին:

ՀԱՍՄԻԿԻ ՎԵՐՋԸ
Օձունի վերականգնման բարերար Մովսես Ձավարյանի հարցազրույցը, որում նա մանրամասնորեն պատմում է, թե ինչպիսի արհեստածին խոչընդոտներ են ստեղծել Հասմիկ Պողոսյանն ու նրա գլխավորած մշակույթի նախարարությունը սրբատեղի վերականգնման ճանապարհին, առիթ է դարձել, որպեսզի մի խումբ լոռեցի ակտիվիստներ հունիսի 14-ին ստորագրահավաք նախաձեռնեն՝ դիմելով Սերժ Սարգսյանին՝ Օձունի վերականգնման հարցում Հասմիկ Պողոսյանի եւ մշակույթի նախարարության գործողությունների (անգործության) ծառայողական քննություն անցկացնելու կոչով: