ՀԱՐՑ. Եթե վթար է տեղի ունենում, եւ մեղավոր մեքենայի վարորդը փախչում է դեպքի վայրից, ապա այդ դեպքում մինչ ապահովագրական ընկերության ներկայացուցչի ժամանելը ի՞նչ պետք է անի մյուս մեքենայի վարորդը:
ՊԱՏԱՍԽԱՆ. Նման դեպքերում անհրաժեշտ է գրանցել դեպքի վայրը լքող մեքենայի հաշվառման համարանիշը եւ անմիջապես հայտնել այն ճանապարհային ոստիկանությանը եւ ապահովագրական ընկերությանը:
Եթե քաղաքացուն չի հաջողվել նկատել հաշվառման համարանիշը, ապա կարելի է փորձել ականատեսներից պարզել այն կամ ուշադրություն դարձնել տվյալ վայրում արտաքին տեսախցիկների առկայության վրա, որոնք, հնարավոր է, գրանցած լինեն պատահարը:
Ցանկացած դեպքում, եթե չի հաջողվել արձանագրել հաշվառման համարանիշը, պետք է հնարավորինս շատ տեղեկություններ հավաքագրել դեպքի վայրը լքած մեքենայի վերաբերյալ (մակնիշը, մոդելը, գույնը, այլ առանձնահատկությունները), որոնք կարող են օգնել ճանապարհային ոստիկանությանը կազմակերպել վերջինիս հետախուզումը:
Այդ գործողություններն իրականացնելիս պետք է լինել հետեւողական եւ ուշադիր, քանի որ եթե հնարավոր չլինի նույնականացնել դեպքի վայրը լքած մեքենան, ապա հնարավոր չի լինի հատուցել Ձեր գույքին պատճառված վնասը:
«ԺՈՂՈՎՈՒՐԴ». Իհարկե լավ կլիներ, որ մեր իրականության մեջ քիչ լինեին նման անբարեխիղճ վարորդներ, եւ բոլորը մինչեւ վերջ պատասխանատու լինեին իրենց արարքների համար, բայց, ամեն դեպքում, մեզ մնում է հորդորել մեր ընթերցողին` հետեւել նշված խորհուրդներին, որպեսզի հետագայում վնասից առաջացած ծախսերն ամբողջովին չմնան իր վրա:
.gif)
