Պետա-իրավական հարցերի մշտական հանձնաժողովում շարունակվում է քննարկվել սահմանադրական փոփոխությունների նախագիծը: «Ժառանգություն» խմբակցության պատգամավոր Զարուհի Փոստանջյանը հարց ուղղեց հարակից զեկուցող Հովհաննես Սահակյանին և հետաքրքրվեց, թե վերջինս ոնց է գնահատում այն հանգամանքը, որ սահմանադրական փոփոխությունների հեղինակ Սերժ Սարգսյանը չի ներկայանում քննարկումներին ու չի պատասխանում պատգամավորների հարցերին:
Պատգամավորը հետաքրքրվեց` նա այդպես էլ փակվա՞ծ կմնա Բաղրամյան 26-ում, թե կգա ու կհայտնի, թե ինչու որոշեց նման նախաձեռնությամբ հանդես գալ:
Հովհաննես Սահակյանն էլ պատասխանեց, որ Սերժ Սարգսյանը հանդիպումներ է անցկացրել թե’ խորհրդարանական, թե’ արտախորհրդարանական քաղաքական ուժերի հետ և դա էլ հենց Փոստանջյանի հարցի պատասխանն է:
«Եթե որոշ քաղաքական ուժեր հակված չեն դա տեսնել, դա նրանց խնդիրն է: Գուցե չեն կարդում սահմանադրական փոփոխությունների նախագիծը, որովհետև այդքան մտավոր ունակություններ չունեն, որ հասկանան, կամ էլ չեն կարդում, որովհետև շոուների սիրահար են: Ձեր խմբակցությունը գնում է Սերժ Սարգսյանի հետ հանդիպման, հետո ասում եք` դա օրինական չի եղել: Մի հատ նայեք ձեր նախընտրական ծրագրերը», – հավելեց Սահակյանը:
Սակայն Զարուհի Փոստանջյանը կրկին շարունակում էր պնդել, որ հարցեր ունի ՀՀ նախագահին:
.gif)
