Ինչ-որ թյուրիմացություն կա. ՀԱԿ խմբակցության պատգամավոր Արամ Մանուկյանին փորձել են մոլորեցնել

Ինչպես հայտնի է՝ ԱԺ ՀԱԿ խմբակցության քարտուղար Արամ Մանուկյանը խորհրդարանում հայտարարել է, թե Մարալիկում կայացած քաղաքապետի ընտրությունների ժամանակ ընտրողներին բաժանվել են ՀԷՑ-ի կողմից տրված էլէներգիայի վճարման անդորրագրեր: Պատգամավորի հայտարարությունը խառնաշփոթ է ստեղծել քաղաքական դաշտում, Արամ Մանուկյանն էլ իր հերթին հայտնվել է բարդ իրավիճակում:

Հիշեցնենք`«Ժողովուրդ» օրաթերթը հայտնել էր, որ Արամ Մանուկյանին ՀՀ վարչապետ Հովիկ Աբրահամյանը, ԱԺ մի քանի պատգամավորներ՝ Սամվել Նիկոյանի գլխավորությամբ, ինչպես նաեւ որոշ հեղինակություններ՝ Երևանից ու Մարալիկից Արամ Մանուկյանին 2 օր ժամանակ են տվել՝ պահանջելով կա՛մ ապացույցներ ներկայացնել, կա՛մ ներողություն խնդրել:

Եվ այսպես, Armlur.am-ը գնաց ստեղծված իրավիճակի հետքերով՝ հասկանալու համար, թե սեպտեմբերի 1-15 ընկած ժամանակահատվածում քանի բաժանորդ է էլէներգիայի սպառման դիմաց վճարումներ իրականացրել, և որքան գումար է ընդհանուր հաշվով մուտք արվել ՀԷՑ հաշվին: Այս հարցի պատասխանը հետաքրքիր է, որպեսզի հնարավոր լինի պարզել, թե քանի կտրոն է «դուրս գրվել» ՀԷՑ-ից, եթե իսկապես նման բան եղել է: Մեր հարցմանն ի պատասխան՝ ՀԷՑ հանրային կապերի բաժնից պաշտոնապես հաղորդեցին, որ նշված ժամանակահատվածում Մարալիկ քաղաքում վճարումներ է արել 72 բաժանորդ՝ ընդհանուր 329 հազար դրամի չափով: Տեղեկացնենք, որ սա ՀԷՑ Մարալիկի քաղաքի բաժանորդների 3.5 տոկոսն է ընդամենը կազմում:

Այսպիսով՝ եթե յուրաքանչյուր ընտանիքում միջինը 2-3 անդամի հաշվարկով փորձենք պատկերացնել իրավիճակը, ապա կստացվի մոտավորապես 150-220 ընտրող: Եվ այստեղ հարց է առաջանում՝ եթե Մարալիկի ընտրություններին մասնակցել է 3154 ընտրող, գործող քաղաքապետը վերընտրվել է 1965 ձայնով, իսկ ԲՀԿ-ական թեկնածուն պարտվել է մոտ 865 ձայնի տարբերությամբ` ստանալով 1110 քվե, ապա ի՞նչ կարող էին փոխել այս իրավիճակում մոտ 200 ընտրողին բաժանված «լույսի» կտրոնները: Եթե նույնիսկ վճարումներ արած բոլոր բաժանորդների փոխարեն քաղաքապետը վճարած լիներ: 200 ձայն հավաքելու համար արդյոք ընտրակաշառք տվողը կընկնե՞ր նման վտանգավոր բեռի տակ: Ակնհայտ է, որ այստեղ ինչ-որ թյուրիմացություն կա, և ԱԺ ՀԱԿ խմբակցության քարտուղար Արամ Մանուկյանին ինչ-որ մարդիկ փորձել են մոլորեցնել:

Պարզվում է` Արամ Մանուկյանն այս օրերին փորձում է տվյալներ հավաքել: Armlur.am-ի հետ զրույցում խոսելով կտրոնների մասին՝ պարոն Մանուկյանը վստահեցրեց. «Ես հետագայում էդ ամենը կասեմ, լա՞վ: Հիմա տվյալներն եմ հավաքում»:

Մնում է սպասել պատգամավորի անցկացրած հետաքննության արդյունքներին:

Տաթև Հարությունյան