Վահան Շիրխանյանին կալանավորեցին

Քիչ առաջ Կենտրոն Նորք Մարաշ դատարանը որոշեց երկու ամսով կալանավորել ՀՀ ՊՆ նախկին փոխնախարար Վահան Շիրխանյանին: Նրա պաշտպան Ստեփան Ոսկանյանն ասաց, որ վերաքննիչ դատարանում բողոքարկելու են այս որոշումը:

Հիշեցնենք, որ դեկտեմբերի 19-ին ԱԱԾ-ն ձերբակալել էր Վահան Շիրխանյանին: Նրան մեղադրանք է առաջադրվել ՀՀ քրեական օրենսգրքի 223-րդ հոդվածի 2-րդ մասով: Նա մեղադրվում է Արթուր Վարդանյանի կողմից ստեղծված «հանցավոր համագործակցությանը մասնակցելու, դրա օգտին գործելու, կոնկրետ հանձնառություն և դերակատարություն ունենալու մեջ:

Հիշեցնենք, որ 2015թ. նոյեմբերի 25-ին Ազգային անվտանգության ծառայությունը Երեւանում վնասազերծել է ծանր հանցագործություն կազմակերպելու մեջ կասկածվող խմբի: ԱԱԾ-ի փոխանցմամբ, նոյեմբերի 25–ին ԱԱԾ աշխատակիցները ոստիկանության հետ համատեղ տան խուզարկության ընթացքում հայտնաբերվել են տարբեր տեսակի ինքնաձիգեր, ատրճանակներ, նռնականետեր (այդ թվում «մուխա» տեսակի), նռնակներ, պայթուցիկ նյութեր եւ պայթուցիկ սարքեր, կապի միջոցներ, փամփուշտներ, փամփշտակալներ, ռազմական հանդերձանք՝ այդ թվում զրահաբաճկոններ: Խուզարկության պահին առանձնատանը, Արթուր Վարդանյանի գլխավորությամբ, հավաքված են եղել հանցավոր խմբակցության 9 անդամները, որոնք ձերբակալվել են, ապա կալանավորվել։