ՀՀԿ-ի ներսում պաշտոնների բաշխման հարցում որոշ հստակեցում կա. ովքեր հրաժեշտ կտան պաշտոններին

Չնայած սպասումներին, ՀՀԿ ԳՄ երեկվա նիստն էլ որեւէ հստակեցում չմտցրեց արդեն տեւական ժամանակ քաղաքական դաշտի թիվ մեկ խնդիրը դարձած ՀՀԿ-ՀՅԴ նոր կոալիցիոն համաձայնագրի հարցում:

ՀՀԿ մամլո խոսնակ Էդուարդ Շարմազանովը նիստի ավարտից հետո լրագրողներին ասաց.« Պետք է ձեզ մի քիչ հիասթափեցնեմ, որովհետեւ կոալիցիայի հետ կապված, համագործակցության հետ կապված վերջնական որեւէ հարց չենք քննարկել: Մինչեւ մեկ շաբաթվա ընթացքում, մինչեւ մյուս շաբաթ մենք կունենանք հստակություն: Այս պահին քննարկումները շարունակվում են, իսկ ԳՄ նիստի հիմնական քննարկումները ծավալվել են ընտրական օրենսգրքի շուրջ»:

Դիտարկմանը, թե Շարմազանովը բառացիորեն նույն բանն ասաց ուղիղ մեկ շաբաթ առաջ ` ՀՀԿ մամլո խոսնակը արձագանքեց.. «Քանի դեռ հստակեցված չէ ամեն ինչ հստակեցված չէ ոչինչ: Համագործակցության հիմքը ոչ թե պաշտոնների բաժանումն է. այլ ամենից առաջ գաղափարախոսությունն է, ծրագրային դրույթներն են»: Անդրադառնալով բանակցությունների երկարաձգմանը` ՀՀԿ մամլո խոսնակը պարզաբանեց. «Իսկ ով է ասել, որ բանակցությունները երկարաձգվում են, Դուք եք ժամկետը սահմանել: Դուք գրում եք, Դուք հերքում եք, հետո մեզ եք մեղադրում, որ բանակցությունները երկարացվել են: Որեւէ մեկը մեր կամ դաշնակցության կողմից օր, ժամ պատարագ նշել է, թե երբ է լինելու»: Մինչդեռ նկատենք, որ հենց ինքը` Շարմազանովն էր ուղիղ մեկ շաբաթ առաջ ՀՀԿ ԳՄ նախորդ նիստից հետո հայտարարել, թե հաջորդ շաբաթ` այսինքն երեկ, հստակեցում կլինի:

«Ժողովուրդ»-ի հետ զրույցում Աժ ՀՀԿ խմբակցության ղեկավար Վահրամ Բաղդասարյանն ու ՀՀԿ-ական պատգամավոր Կարեն Ավագյանը նույնպես նշեցին, որ դեռեւս քննարկումները շարունակվում են, եւ նիստի ընթացքում կոալիցիայի հարցով հստակ որոշում չի կայացվել: Թե ինչն է պատճառը, որ ՀՀԿ-ականները ձգձգում են որոշման կայացումը` թերեւս դժվար չէ կռահել: Ամենայն հավանականությամբ նրանք դեռ չեն կողնմորոշվում թե ում պաշտոնից ազատեն, ում` ոչ:

Այնուամենայնիվ, «Ժողովուրդ»-ի տեղեկություններով ՀՀԿ-ի ներսում պաշտոնների բաշխման հարցում որոշ հստակեցում կա: Մասնավորապես Արագածոտնի մարզպետի պաշտոնում հնարավոր է նշանակվի Արագածոտնի նախկին մարզպետ Գաբրիել Գյոզալյանը, իսկ ՀՅԴ-ին բաժին հասնելիք մյուս մարզը կարող է լինել Շիրակը կամ Սյունիքը: Նախարարներից, ըստ ամենայնի, իրենց պաշտոնին հրաժեշտ կտան ՀՀ էկոնոմիկայի նախարար Կարեն Ճշմարիտյանը`տեղը զիջելով ՀՅԴ խմբակցության պատգամավոր Արծվիկ Մինասյանին եւ ՀՀ Աշխատանքի և սոցիալական հարցերի նախարար Արտեմ Ասատրյանը, ում կփոխարինի նախկին գյուղնախարար, ՀՅԴ անդամ Դավիթ Լոքյանը:

ԱՐՓԻՆԵ ԹՈՎՄԱՍՅԱՆ