ԼՈՒՐ ԿԱԴՐ

Լուսանկարը՝ Գագիկ Շամշյանի

Երեկ` ապրիլի 20-ին, Լոռու մարզի Աքորի գյուղում տեղի ունեցավ ապրիլի 19-ին ղարաբաղա-ադրբեջանական հակամարտ զորքերի շփման գծում զոհված 19-ամյա Գեւորգ Գեւորգյանի հոգեհանգստի արարողությունը:

 
ՀԱՐՑ. Խնդրում եմ ասեք, եթե անձը, մինչեւ կենսաթոշակային տարիքը, կորցրել է աշխատանքը, ապա նա իրավունք ունի՞ ստանալ իր կուտակային կենսաթոշակը մինչեւ 63 տարեկան դառնալը:

Լարիսա Մանուկյան (59 տարեկան, քիմիկոս)

ՊԱՏԱՍԽԱՆ. Հայտնում ենք, որ աշխատանքը կորցնելը բավարար իրավական հիմք չէ նախքան կենսաթոշակային տարիքը լրանալը կուտակային կենսաթոշակը ստանալու համար: Մասնակիցը մինչեւ 63 տարին լրանալը կարող է ստանալ իր կուտակային միջոցները հետեւյալ դեպքերում՝
1) օրենսդրությամբ սահմանված կարգով ճանաչվել է աշխատանքային գործունեությամբ զբաղվելու կարողության երրորդ աստիճանի սահմանափակում ունեցող հաշմանդամ.
2) առողջական ծայրահեղ ծանր վիճակում է եւ հիվանդ է կենսական կարեւոր օրգանների անբուժելի ախտահարումներով, որը հավաստվում է առողջապահության բնագավառում ՀՀ կառավարության լիազոր մարմնի տված եզրակացությամբ.
3) ՀՀ-ում աշխատող օտարերկրացի մասնակից է եւ վերադառնում է իր մշտական բնակության երկիր:
Օրենքը նախատեսում է կուտակային միջոցների՝ մինչեւ 63 տարեկանը ստանալու եւս մեկ դեպք՝
եթե լրացել է մասնակցի 55 տարին եւ նրա կենսաթոշակային հաշվում առկա ֆոնդի փայերի հաշվարկային արժեքը այնքան է, որ բավարարում է հիմնական կենսաթոշակի 5-ապատիկի չափով ցմահ անուիտետ գնելու համար, ապա նա կարող է ստանալ իր կուտակած միջոցները 55 տարեկանից՝ կենսաթոշակային փայերի մի մասի մարմամբ կնքելով հիմնական կենսաթոշակի 5-ապատիկի չափով անուիտետ, իսկ մնացած մասը ստանալ իր նախընտրած տարբերակով: Սա կոչվում է վաղաժամ կուտակային կենսաթոշակի իրավունք:

Կենսաթոշակային համակարգի իրազեկման կենտրոն

«ԺՈՂՈՎՈՒՐԴ». Ավելացնենք, որ տարիքային կենսաթոշակի իրավունք ունի 63 տարին լրացած անձը 25 տարվա ապահովագրական ստաժի առկայության դեպքում: Տարիքային կենսաթոշակի իրավունք ձեռք բերած անձը կենսաթոշակ նշանակելու համար կարող է դիմել առանց ժամկետի սահմանափակման:

 
ՀԱՐՑ. Ես ուզում եմ իմանալ, թե ամուսնալուծության համար կոնկրետ ի՞նչ փաստաթղթեր են ներկայացվում, եւ ի՞նչ ժամկետում է կատարվում ամուսնալուծության պետական գրանցումը:

Ռուբինա Հայրապետյան (30 տարեկան, տնային տնտեսուհի)

ՊԱՏԱՍԽԱՆ. Տեղեկացնում ենք, որ ամուսնալուծության պետական գրանցման համար ներկայացվում են՝
-անձը հաստատող փաստաթուղթ,
-ամուսնության վկայական (առկայության դեպքում),
-ամուսինների համատեղ դիմումը` ՔԿԱԳ մարմնում ամուսինների միջեւ փոխադարձ համաձայնության առկայությամբ ամուսնալուծություն կատարելու համար,
-ամուսիններից մեկի դիմումը, եթե մյուսը դատարանի կողմից ճանաչվել է անհայտ բացակայող կամ անգործունակ կամ դատապարտվել է ազատազրկման երեք տարուց ոչ պակաս ժամկետով,
-ամուսնու դիմումը եւ դատարանի՝ օրինական ուժի մեջ մտած վճիռը դատական կարգով ամուսնալուծություն կատարած լինելու դեպքում:
Հայտնում ենք նաեւ, որ ամուսնալուծության գրանցումը եւ ամուսիններից յուրաքանչյուրին ամուսնալուծության վկայականներ տրամադրելը կատարվում է ՔԿԱԳ մարմնի կողմից ամուսնալուծության մասին դիմում տալու օրվանից առնվազն մեկ ամիս հետո, բայց երեք ամսից ոչ ուշ:

«Ձեր իրավախորհրդատու» փաստաբանական ընկերություն

«ԺՈՂՈՎՈՒՐԴ». Տեղեկացնենք, որ դատական կարգով ամուսնալուծվելու դեպքում ամուսնալուծության գրանցումը կատարվում է դատարանի վճիռը օրինական ուժի մեջ մտնելուց հետո՝ ՔԿԱԳ մարմին դիմումը ներկայացնելու օրը: