Հանձնարարվել է նախապատրաստվել նոր ուսումնական տարվան

Երևանի քաղաքապետարանում տեղի ունեցած հերթական աշխատանքային խորհրդակցության ժամանակ  պատասխանատու բոլոր կառույցներին հանձնարարվել է նախապատրաստական աշխատանքներ տանել 2016-2017թթ. ուսումնական տարին մայրաքաղաքի հանրակրթական դպրոցներում և արտադպրոցական հաստատություններում պատշաճ դիմավորելու նպատակով:

Ըստ այդմ` հանձնարարվել է ուսումնասիրել կրթական հաստատությունների էներգամատակարարման, գազամատակարարման և ջրամատակարարման ցանցերն ու քայլեր ձեռնարկել նկատված թերությունները սեղմ ժամկետում վերացնելու ուղղությամբ: Տրանսպորտի վարչությանը հանձնարարվել է  ճանապարհային ոստիկանության հետ համատեղ դպրոցների հարակից տարածքներում կատարել համապատասխան գծանշումներ:

Հանրակրթության վարչությանը հանձնարարվել է ձեռնարկել համապատասխան քայլեր՝ քաղաքապետարանի ենթակայության դպրոցների տարրական դասարանների բոլոր աշակերտներին անվճար դասագրքերով ապահովելու նպատակով: Առողջապահության վարչությանն  էլ  հանձնարարվել է առաջին բուժօգնության անհրաժեշտ դեղորայքով և պարագաներով համալրել  կրթական հաստատությունների բուժկետերը:

Խորհրդակցության ժամանակ նաև զեկուցվել է, որ նախորդ շաբաթ շարունակվել է վերահսկողությունը՝ քաղաքապետարանի ենթակայության մանկապարտեզներին մատակարարվող սննդի պիտանելիության ժամկետների, որակի և պահպանման պայմանների նկատմամբ։ Մայրաքաղաքի 5 վարչական շրջանների 40 մանկապարտեզներում անակնկալ ստուգայցերի ժամանակ խախտման դեպքեր չեն արձանագրվել: Հանձնարարվել է շարունակել մշտական հսկողությունը:

Ոչ սահմանված վայրերում աղբը թափելու դեպքերի առնչությամբ զեկուցվել է, որ նախորդ շաբաթ արձանագրվել է 50 դեպք, որից 43-ը՝ շինարարական աղբի մասով: Հանձնարարվել է շարունակել խիստ հսկողությունն ու հանրությանը պարբերաբար իրազեկել աղբը ոչ սահմանված վայրերում թափելու անթույլատրելիության և դրա համար նախատեսված վարչական տույժերի կիրառման մասին:

Շինարարության և բարեկարգման վարչության պետը զեկուցել է, որ ընթացքում են 2016թ. ծրագրով նախատեսված՝ փողոցների, մայթերի և բակային տարածքների ասֆալտապատման, մասնավորապես՝ փոսալցման, փոսային նորոգման և ճաքալցման աշխատանքները: Հանձնարարվել է սահմնաված ժամկետում ավարտել փոսանորոգման աշխատանքները և գործընթացը պահել ամենօրյա ուշադրության կենտրոնում:

Խորհրդակցության ժամանակ զեկուցվել է նաև, որ, հաշվի առնելով եղանակային պայմանները, կանաչ տարածքների պատշաճ խնամք ապահովելու նպատակով   կատարվում է երկհերթ ոռոգում:

Երևանի քաղաքապետարանի տեղեկատվության

և հասարակայնության հետ կապերի վարչություն