Հոկտեմբերի 1-2-ը Հայաստանի հանրապետական կուսակցության երիտասարդական կազմակերպության և Հայաստանի պետական տնտեսագիտական համալսարանի ՈՒսանողական խորհրդի համատեղ նախաձեռնությամբ շուրջ 50 ուսանողներ այցելություն են կատարել Լեռնային Ղարաբաղի Հանրապետության Մարտունու շրջանում տեղակայված պաշտպանական շրջան: Այս այցելությամբ ՀՊՏՀ ՈՒսանողական խորհուրդը եզրափակել է ՀՀ անկախության 25-ամյակին նվիրված միջոցառումների շարքը:
<<Անկախությունն սկսվում է առաջնագծից>> ծրագրի շրջանակներում ուսանողները ծանոթացել են զորամասի կառուցվածքին և առօրյային, ճաշել զինվորական ճաշարանում, գիշերն անցկացրել զորանոցներում և առավոտյան մասնակցել նախավարժանքին ու ֆիզպատրաստության դասընթացին:
Իր խոսքում ՀՊՏՀ ՈՒԽ նախագահ Սերգեյ Խառատյանը որպես ծրագրի կարևորագույն առանձնահատկություն նշել է այն հանգամանքը, որ մասնակիցների մեջ ներգրավված են եղել մեծ թվով ուսանողուհիներ, ովքեր խիստ ոգևորությամբ են մասնակցել ծրագրին:
Ինչպես նախորդ ծրագրերին, այս անգամ ևս ուսանողները զորամասին նվիրել են հեռուստացույց, բարձրախոսներ, հեռադիտակներ և հատուկ նշանակության պարագաներ, ինչպես նաև քաղցրավենիք ողջ զորամասի համար և այլ նվերներ:
Երկօրյա այցելությունն ամփոփվել է Տիգրանակերտ ամրոց, Բերդաքաղաք Շուշի, Սուրբ Ղազանչեցոց եկեղեցի, Դադիվանքի եկեղեցական համալիր և Արցախի այլ տեսարժան վայրեր կատարած շրջագայությամբ:
ՀՀԿ երիտասարդական կազմակերպություն
.gif)
