Ինչ է իրականում տեղի ունեցել «Ջամբո» ռեստորանային համալիրում. նոր մանրամասներ «Պոնչոյի» որդիների առևանգման մասին

Oգոստոսի 16-ին, Հանրային երկրորդ հեռուստաալիքով հեռարձակվող «Պահմտոցի» հաղորդումից հայտնի Վահագն Սիմոնյանը, ում հանրությունն ավելի շատ ճանաչում է «Պոնչո» մականվամբ, ահազանգել է ոստիկանություն և Արտակարգ իրավիճակների նախարարության 911 ծառայություն ու հայտնել, որ իր 2 անչափահաս տղաներին առևանգել են և պատանդ են պահում Ձորաղբյուրում գտնվող «Ջամբո» էկզոտիկ պարկ- ռեստորանում։

ArmLur.am-ը դեպքի առթիվ  ՀՀ ոստիկանության  լրատվական ծառայությունից տեղեկացավ, որ 16.08.2017թ-ին ժամը 12.40-ին ՀՀ ոստիկանության Կոտայքի բաժին ահազանգ է ստացվել այն մասին, որ 911 ծառայություն է զանգահարել Վահագն Սիմոնյանը և հայտնել, որ Ձորաղբյուրի «Ջամբո» ռեստորանային համալիրում 14 տարեկան 2 երեխա են պատանդ վերցրել:

Զեռնարկված ստուգումների և միջոցառումների արդյունքում պարզվել է, որ երեխաները իրենց մոր հետ ապրում են նշված ռեստորանային համալիրի հարակից տարածքում գտնվող առանձնատանը, իրենց պատանդ չեն վերցրել և իրենք գտնվում են ապահով պայմաններում:

ArmLur.am-ին հաջողվեց նաեւ զրուցել «Ջամբո» ռեստորանային համալիրի տնօրեն Արտյոմ Վարդանյանի հետ, ով մեզ հետ զրույցում հայտնեց, որ այս պահին երեխաները ոստիկանությունում բացատրություն են գրում, որ իրենց  ոչ մեկ հարկադրաբար չի պահում:

«Դա նորմալ մարդու արարք չէ, ինքն ամբողջ հանրապետությունով իրան խայտառակ արեց: Ես պատրաստվում եմ նրան դատի տալ, հիմա ոստիկաններն ամբողջ նյութերը հավաքում են, որ չորրորդ տարին է երեխաներն այստեղ են ապրում: Ինչ այդ երեխաները եկել են, նա մի կոպեկ չի տվել եւ երբեւիցե չի էլ հիշել նրանց մասին: Հիմա էլ կապիկություն է անում …ինձ թվում է ինքը չկայացած կլոուն է, որ ուզում է իր մասին հիշեն: Զանգում ա իր 14 տարեկան տղային, ասում է կարող ա քեզ գոմիկ են սարքել: Երեխայի հոգեկանը խանգարվել ա, անգամ չի ուզում դպրոց գնա: Բոլոր հեռախոսային ձայնագրությունները կան, և նա իր  այս քայլը  չի մարսելու: Նա մարդ չէ, ուղղակի վիժվածք է»,-ասաց նա:

Մեր զրուցակի խոսքով՝  Վահագն Սիմոնյանն այս քայլին է գնացել` նորից ասպարեզ մտնելու համար, քանի որ նա ոչ մի հեռուստաընկերության կողմից հրավեր չի ստանում  եւ հիշվելու կարիք ունի:

«Ոչ մի արգելք նրան չի եղել երեխաներին տեսնելու: Ես երբեք քիթս չեմ խոթել նրանց հարաբերությունների մեջ, բայց տեսա, որ այս երեխայի հոգեբանությունը խախտվել է, ո՞նց կարելի է  այդ տարիքի տղային նման բաներ ասել»,-նշեց Արտյոմ Վարդանյանը:

Նրա հավելմամբ՝  Վահագն Սիմոնյանի պատճառով իր բիզնեսը տուժել է: Մարդիկ վախենում են գնալ «Ջամբո» ռեստորանային համալիր, քանի որ մտածում են, որ այնտեղ մարդկանց են պատամդ պահում:

Լիդա Եղիազարյան