ԼՈՒՐ ԿԱԴՐ

Լուսանկարն արվել է Գեղարքունիքի մարզում

Երեկ ողբերգական ավտովթար է տեղի ունեցել Գեղարքունիքի մարզի Վարդենիս-Մարտունի ավտոճանապարհին: Նախնական տվյալներով` կա մեկ զոհ: Վերջինս Գեղարքունիքի մարզի Ծովակ գյուղի բնակիչ է:

ՀԱՐՑ. Ես ունեմ սոցիալական փաթեթ: Ուզում եմ իմանալ` կարո՞ղ եմ սոցփաթեթում առկա գումարով կատարել իմ վարկի վճարումները: Խնդրում եմ կոնկրետ ասել, թե սոցիալական ի՞նչ ծառայություններ են ընդգրկված սոցփաթեթում:

Լիաննա Պողոսյան (32 տարեկան, մանկավարժ)

ՊԱՏԱՍԽԱՆ. Սոցիալական փաթեթը ներառում է հետեւյալ ծառայությունները`
1. առողջապահական փաթեթ` բժշկական օգնության եւ սպասարկման կազմակերպում ու ֆինանսավորում,
2. հիփոթեքային վարկի ամսական վճարի մարում,
3. ուսման վճար` ՀՀ կրթության եւ գիտության նախարարության կողմից հաստատված ուսումնական ծրագրերով,
4. հանգստի ապահովում Հայաստանի Հանրապետությունում եւ Լեռնային Ղարաբաղի Հանրապետությունում:
Ընդ որում, առողջապահական փաթեթն աշխատողների համար պարտադիր պայման է, որի արժեքը տարեկան կազմում է 52.000 դրամ:

Կենսաթոշակային համակարգի իրազեկման կենտրոն

«ԺՈՂՈՎՈՒՐԴ». Նշենք, որ աշխատանքից ազատվելու դեպքում սոցփաթեթի հաշվում մնացած (կուտակված) գումարի օգտագործման ուղղությունները մնում են նույնը:

ՀԱՐՑ. Խնդրում եմ ասեք` գույքահարկի վճարման ժամկետը ե՞րբ է սահմանված: Ուզում եմ իմանալ` հնարավո՞ր է գույքահարկի վճարը մաս-մաս վճարել:

Էլեն Մխիթարյան (41 տարեկան)

ՊԱՏԱՍԽԱՆ. Տեղեկացնում ենք, որ «Գույքահարկի մասին» ՀՀ օրենքի 13-րդ հոդվածի համաձայն`
1. Կազմակերպությունները գույքահարկի հաշվարկված գումարները նույն հոդվածի 3-րդ մասով սահմանված կարգով համապատասխան բյուջե են վճարում յուրաքանչյուր կիսամյակ` մինչեւ տվյալ կիսամյակին հաջորդող ամսվա 20-ը ներառյալ:
2. Ֆիզիկական անձինք գույքահարկի տարեկան գումարը նույն հոդվածի 3-րդ մասով սահմանված կարգով համապատասխան բյուջե են վճարում մինչեւ հաշվետու տարվա դեկտեմբերի 1-ը ներառյալ` բացառությամբ ֆիզիկական անձանց տարեկան տեխնիկական զննության ենթակա փոխադրամիջոցների համար գույքահարկի գծով հարկային պարտավորությունների, որոնք ամբողջությամբ կատարում են մինչեւ փոխադրամիջոցների` տվյալ տարվա տեխնիկական զննության ներկայացնելը:
Հայտնում ենք նաեւ, որ «Գույքահարկի մասին» ՀՀ օրենքի համապատասխան կազմակերպությունները գույքահարկի հաշվարկված գումարները համապատասխան բյուջե են վճարում յուրաքանչյուր կիսամյակ` մինչեւ տվյալ կիսամյակին հաջորդող ամսվա 20-ը ներառյալ: Ֆիզիկական անձինք գույքահարկի տարեկան գումարը համապատասխան բյուջե են վճարում մինչեւ հաշվետու տարվա դեկտեմբերի 1-ը ներառյալ` բացառությամբ հետեւյալ դեպքի, երբ ֆիզիկական անձինք տարեկան տեխնիկական զննության ենթակա փոխադրամիջոցների համար գույքահարկի գծով հարկային պարտավորություններն ամբողջությամբ կատարում են մինչեւ փոխադրամիջոցների` տվյալ տարվա տեխնիկական զննության ներկայացնելը:

ՀՀ պետական եկամուտների կոմիտե

«ԺՈՂՈՎՈՒՐԴ». Ավելացնենք, որ եթե հարկվող օբյեկտն ընդհանուր համատեղ սեփականության իրավունքով պատկանում է մեկից ավելի հարկ վճարողների, ապա գույքահարկի գծով սույն օրենքով սահմանված պարտավորությունների համար նրանք կրում են համապարտ պատասխանատվություն: