Պատգամավոր կանայք` Սերժ Սարգսյանի վարչապետության մասին

Ինչպես հայտնի է`վարչապետի պաշտոնում ՀՀԿ թեկնածուն Սերժ Սարգսյանն է: ArmLur.am-ը Սարգսյանի թեկնածության վերաբերյալ զրուցել է ՀՀԿ եւ ՀՅԴ խմբակցությունների պատգամավորներ Ջեմմա Բաղդասարյանի եւ Արմենուհի Կյուրեղյանի հետ:

ԱԺ ՀՀԿ խմբակցության պատգամավոր Ջեմմա Բաղդասարյան

-Տիկին Բաղդասարյան, ո՞ր արժանիքների համար պետք է վարչապետ լինի հենց Սերժ Սարգսյանը:

-Արժանիքներն այնքան շատ են… արժանիքներն իսկապես շատ են:

-Օրինակ…մի քանիսը թվեք…

-Որպես քաղաքական գործիչ առաջինը իր տեսլականը` մեր երկրի զարգացման: Երկրորդը` երկրի անվտանգությունն ապահովելու համար, տնտեսական զարգացումը մեր երկրի, միջազգային ասպարեզում Հայաստան-ԵՄ եւ Հայաստան-ԵԱՏՄ համագործակցություն: Այսինքն, արժանիքներն այնքան շատ են…

-Իսկ Կարեն Կարապետյանը չէ՞ր կարող այդ ամենն իրականացնել:

-Կարեն Կարապետյանն իր գործը շատ լավ է անում, տնտեսական ոլորտում բավական մեծ գործ է անում:

-Այդ դեպքում ինչո՞ւ իր թեկնածությունը չառաջադրվեց:

-Նա իր գործն անելու է:

-Այսինքն, պաշտոն ունենալո՞ւ է` ամեն դեպքում:

-Միանշանակ:

ԱԺ ՀՅԴ խմբակցության պատգամավոր Արմենուհի Կյուրեղյան

-Տիկի′ն Կյուրեղյան, ՀՅԴ-ն հայտարարել է, որ պատրաստ է սատարել ՀՀԿ թեկնածու Սերժ Սարգսյանին: Սակայն եթե օրինակ որոշեիք, որ  Ս. Սարգսյանին որպես վարչապետ չպետք է ընտրեք, կարո՞ղ էիք Ձեր տեսակետն առաջ տանել:

-Գիտեք ինչ, այս դեպքը շատ հստակ դեպք է: Վարչապետի թեկնածության իրավունքը մեր ժողովուրդը տվել է Հանրապետական կուսակցությանը: Եվ այս դեպքում մենք պետք է սատար կանգնենք, որովհետեւ այդ թեկնածուն, միեւնույն է` պետք է իրականացնի ՀՀԿ ծրագիրը:

-Այսինքն, ՀՅԴ-ն ցանկանար, թե ոչ` պետք է սատարե՞ր ամեն դեպքում ՀՀԿ թեկնածուին:

-Ցանկանար, թե ոչ` իհարկե: Այստեղ արդեն մեր կուսակցությունը կամ մյուս կուսակցություններն ընտրության տեղ չունեն: Միևնույն է. Սերժ Սարգսյանն է, թե Սարգիս Սերժյանը, պարզ է, որ ամեն դեպքում թեկնածուն ՀՀԿ-ի կողմից է: Եվ նա պետք է իրականացնի այդ կուսակցության գործառույթները:

Զրուցեց ՄԵՐԻ ՄԱՐՏԻՐՈՍՅԱՆԸ