ԴԺԳՈՀՈՒԹՅՈՒՆՆԵՐԸ ՍՏԻՊՈՒՄ ԵՆ ԵՐԿԱՐ ՔՆՆԱՐԿԵԼ

Յոթերորդ գումարման խորհրդարանի առաջին նստաշրջանը, որի օրակարգում 7 հարց է ընդգրկված, դեռ շարունակվում է: Այսօր խորհրդարանը կավարտի օրակարգային հինգ հարցերի քննարկումը, իսկ ահա վերջին երկու հարցերը քննարկվելու են ավելի ուշ։

Բանն այն է, որ այս նստաշրջանն ավարտվում է կառավարության ծրագրի հաստատմամբ, այսինքն՝ ամբողջ օրակարգի սպառմամբ: Սակայն ԱԺ կանոնակարգով հստակ սահմանված է, որ առաջինից հինգ հարցերը պետք է ամենօրյա ռեժիմով քննարկվեն: Այդպես էլ արվում է: Միաժամանակ խորհրդարանը դադար է վերցնելու ԱԺ մշտական հանձնաժողովների հարցի քննարկումից հետո: Ավելի ուշ կանցնի մյուս երկու հարցերին՝ կառուցվածքի հնարավոր փոփոխության հարցին եւ կառավարության ծրագրին:
Հենց այս հանգամանքն էլ վերջին օրերին տարակուսանք էր առաջացրել նաեւ պատգամավորների մոտ, որոնք կարծում էին, թե վերջին երկու հարցերն էլ քննարկվում են իրար հետեւից։ Սակայն Ազգային ժողովի քարտուղարության պետ Թաթուլ Սողոմոնյանը «Ժողովուրդ» օրաթերթի հետ զրույցում նշեց, թե այս ընթացակարգի մեջ ոչ մի սխալ չկա, եւ կառավարության ծրագրի քննարկումը ներառվել է օրակարգում օրենքի պահանջով, իսկ կառուցվածքային փոփոխությունների հարցը՝ կառավարության առաջարկով, եւ քննարկվելու է կրկին գործադիրի հայեցողությամբ։
Իսկ ի՞նչ է ենթադրում օրենքը: Նախ նկատենք, որ կառավարության կառուցվածքում փոփոխություններ կատարելու մասին համապատասխան նախագիծը դեռեւս պատրաստ չէ։ Երեկ այս փաստին կառավարության նիստում անդրադարձել է նաեւ վարչապետ Նիկոլ Փաշինյանը։ Նա հայտարարեց, թե մինչ կառավարության կառուցվածքի մասին նոր օրենքի ընդունումը առաջիկայում կնշանակվի կառավարության միայն 2/3-րդ, իսկ 1/3-րդը չի նշանակվի: «Օրենքի համաձայն՝ կառավարությունը ձեւավորված է համարվում, երբ նշանակված է կառավարության անդամների 2/3-րդը: Մենք կգնանք այդ ճանապարհով՝ կառավարության անդամների 2/3-րդը կնշանակվի, 1/3-րդը չի նշանակվի, քանի դեռ մինչեւ վերջին դետալը չենք հստակեցրել կառավարության կազմի, կառուցվածքի փոփոխությունների հետ կապված հարցերը: Մի բան ակնհայտ է՝ նախարարությունների թիվը կրճատվելու է, եւ ուղղակի այս պրոցեսը պետք է տանել մաքսիմալ անցնցում, սահուն եւ կանխատեսելի ճանապարհով», – նշել էր վարչապետը։
Սակայն նկատենք, որ կառավարությունում փոփոխությունների մասին վարչապետը խոսել էր դեռ օգոստոսի 17-ին՝ իր պաշտոնավարան 100 օրվա ամփոփման ժամանակ՝ հանրահավաքում ելույթ ունենալիս, սակայն փաստացի գործընթացը դանդաղում է, ինչը նշանակում է, որ դժգոհություններ են առկա։ Նախ հղում անելով Սահմանադրության 150-րդ հոդվածին` նշենք, որ կառավարությունը կազմավորվում է վարչապետ նշանակվելուց հետո՝ տասնհինգօրյա ժամկետում: Իր նշանակումից հետո վարչապետը հնգօրյա ժամկետում հանրապետության նախագահին առաջարկում է փոխվարչապետների եւ նախարարների թեկնածուներին: Հանրապետության նախագահը եռօրյա ժամկետում կա՛մ նշանակում է փոխվարչապետներին եւ նախարարներին, կա՛մ դիմում է Սահմանադրական դատարան»։
Իսկ հոդված 151-ն էլ սահմանում է կառավարության ծրագրի հետ կապված մանրամասները։
1. Կառավարության կազմավորումից հետո՝ քսանօրյա ժամկետում, վարչապետն Ազգային ժողով է ներկայացնում Կառավարության ծրագիրը:
2. Ազգային ժողովը Կառավարության ծրագրին հավանություն է տալիս յոթնօրյա ժամկետում` պատգամավորների ընդհանուր թվի ձայների մեծամասնությամբ:
Ընդգծենք, որ կառավարության կառուցվածքում փոփոխություններ կատարելու մասին նախագիծը մամուլի ձեռքում էր հայտնվել արդեն նախկին պատգամավոր Արփինե Հովհաննիսյանի շնորհիվ, ով հրապարակել էր նախագծի աշխատանքային տարբերակը։ Սակայն իշխանության ներկայացուցիչները շտապեցին ընդգծել, թե դա միայն աշխատանքային տարբերակն է, որը պետք է լայն քննարկումներ անցնի բոլոր նախարարություններով։
Եվ, ահա, «Ժողովուրդ» օրաթերթի տեղեկություններով` այս պահի դրությամբ նախագիծը վերջնականապես պատրաստ չէ, քանի որ մի քանի միացումների շուրջ տարընթերցումներ եւ անհամաձայնություններ են եղել եւ անգամ հենց իշխող ուժի ներսում։ Խոսքը հատկապես Տնտեսական զարգացման եւ ներդրումների նախարարության եւ Գյուղատնտեսության նախարարության միացման մասին է, որը աննպատակահարմար են համարում ոլորտի մասնագետները։ Սփյուռքի նախարարության հարցը եւս վերջնականապես որոշված չէ, եւ, առհասարակ, լուծարումը դժգոհություններ է առաջացրել, եւ չի բացառվում, որ այդ որոշումն էլ չեղյալ համարվի։ Մեր տեղեկություններով` իշխող ուժը խնդիրներ ունի նաեւ կադրերի հարցում եւ ցանկանում է իսկապես պրոֆեսիոնալների հնարավորություն տալ։
Երեկ լրագրողների հետ զրույցում «Իմ քայլը» խմբակցության պատգամավոր Վահագն Հովակիմյանը, անդրադառնալով հարցին, թե ինչու կառավարությունը ԱԺ չի ուղարկել կառավարության կառուցվածքի մասին օրենքի նախագիծը, նկատեց, թե կառավարությունը չի ուզում հապշտապ նախագիծ բերել, ամբողջական փաթեթը պատրաստ կլինի, կներկայացնեն խորհրդարանի քննարկմանը: Հարցին, թե կառավարության դիրքորոշումը դեռ հստակ չէ՞ կառուցվածքի փոփոխության հարցում, Վահագն Հովակիմյանը պատասխանեց, որ այն փաստը, որ նախագիծը դեռ չի եկել խորհրդարան, հիմք է տալիս ենթադրելու, որ դեռ պատրաստ չէ: Ըստ նրա՝ հնարավոր չէ, որ կառավարությունը այդ նախագիծը խորհրդարան չուղարկի, քանի որ օպտիմալացման գաղափարը նաեւ իրենց նախընտրական ծրագրի հիմքում է եղել:
Հ.Գ. Մինչ այդ նկատենք, որ ՀՀ վարչապետի առաջարկով` ՀՀ նախագահը նշանակել է երկու փոխվարչապետներին՝ Տիգրան Ավինյանին ու Մհեր Գրիգորյանին, իսկ նախարարները դեռ նշանակված չեն: Ավանդույթի համաձայն` սովորաբար առաջինը նշանակվում են պաշտպանության, արտաքին գործերի, ֆինանսների նախարարները, իսկ մյուսների հարցը որոշվում է ավելի ուշ:

ՆԱԻՐԱ ՀՈՎՀԱՆՆԻՍՅԱՆ

ԱՌԱՋԻՆ ԲԱՑԱԿԱՆԵՐԸ
Նախորդ գումարումների խորհրդարաններում ամենաշատ բացակայություններ ունեցող պատգամավոր Գագիկ Ծառուկյանը կրկին սկսել է բացակայել։ Նորընտիր գումարման խորհրդարանի առաջին նստաշրջանում նա մասնակցեց միայն առաջին երկու օրերի նիստերին, անգամ՝ ելույթ ունեցավ, մինչդեռ նախկինում նա երբեք ամբիոնին մոտ չէր գնացել: Իսկ ահա երեկ եւ նախորդ օրը Ծառուկյանը բացակայում էր։ Մյուս խմբակցությունների պատգամավորները պարտաճանաչ են, հաճախում են նիստերին եւ հաճախ դուրս էլ չեն գալիս նիստերի դահլիճից մինչեւ ընդմիջում հայտարարելը։ Երեկ, սակայն, իշխող խմբակցության ներսում առաջին բացական կար. ամենաերիտասարդ պատգամավոր Սոնա Ղազարյանը երեկ չէր եկել նիստի։ «Ժողովուրդ» օրաթերթի հետ զրույցում Ղազարյանը տեղեկացրեց, որ բացակայել է հիվանդության պատճառով. այս օրերին տարածված շնչառական վարակը չի շրջանցել նաեւ նրան: Ղազարյանն ասաց, որ վատառողջության մասին տեղյակ է պահել խմբակցության անդամներին, նաեւ ԱԺ բժշկից տեղեկանք կներկայացնի:

ՏԵՂԱՓՈԽՈՒՄ ԵՆ
Խորհրդարանում դեռեւս ակտիվորեն ընթանում են տեղափոխման աշխատանքները։ «Ժողովուրդ» օրաթերթին հայտնի դարձավ, որ ԲՀԿ խմբակցության պատգամավորները նոր մասնաշենքից տեղափոխվելու են հին մասնաշենք, եւ երեկ ամբողջ օրվա ընթացքում այդ խմբակցության պատգամավորները զբաղված էին իրենց աշխատասենյակների գույքը մի տեղից մյուսը տեղափոխելով։ Աշխատասենյակների խնդիր առկա է բոլոր խմբակցությունների մոտ։ Ընդ որում, «Իմ քայլը» խմբակցության ներսում դեռ կան պատգամավորներ, որոնց աշխատասենյակի հարցը դեռ չի լուծվել, իսկ շատերն էլ չնայած աշխատասենյակ ունեն, սակայն չունեն ոչ մի գույք, եւ նստում են դատարկ աշխատասենյակներում, մինչեւ նրանց նաեւ գույք կհատկացնեն։

ԿՆԵՐՎԵՆ ԱԿՏԵՐԸ
«Ժողովուրդ» օրաթերթը տեղեկացավ, որ ՀՀ տրանսպորտի, կապի եւ տեղեկատվական տեխնոլոգիաների նախարարությունը պատրաստվում է համաներել թվով 3 հազար 623 վարչական ակտ: Այսինքն` առանց համապատասխան լիցենզիայի մարդատար-տաքսի ուղեւորափոխադրումներ իրականացնելու համար վարչական իրավախախտում կատարած անձինք կազատվեն տրանսպորտային տեսչության կողմից իրականացված վերահսկողության արդյունքում վարչական ակտերով նախատեսված տուգանքներից, ինչպես նաեւ կազատվեն կատարողական գործողությունների կատարման ծախսերը վճարելու պարտականությունից: Մեզ հայտնի դարձավ, որ 2016-2018 թվականներին կայացվել են թվով 5 հազար 78 վարչական ակտեր, որից վճարվել են 2 հազար 455-ը: Իսկ թվով 3 հազար 623 վարչական ակտերի մասով վարչական հասցեատերերի կողմից վճարումներ չեն կատարվել` պայմանավորված սոցիալ-տնտեսական ծանր վիճակով:

ՉԵՆ ՎԱԽԵՑՆՈՒՄ
«Իմ քայլը» դաշինքի խմբակցության ղեկավար Լիլիթ Մակունցը պատասխանել է «Լուսավոր Հայաստան» կուսակցության նախագահ Էդմոն Մարուքյանի քննադատությանը` գործող իշխանության հասցեին: Ըստ նրա` իրավունքների պաշտպանության համատեքստում Մարուքյանի արած հայտարարությունն իրականությանը չի համապատասխանում: «Ինչպես Հայաստանի իշխանությունների, այնպես էլ ընդդիմության հռետորաբանությունը պետք է լինի իրավունքի եւ օրենքի գերակայության, ինչպես նաեւ օրենսդիր, գործադիր եւ դատական իշխանությունների հստակ բաժանման համատեքստում»,-ասել է Մակունցը: Անդրադառնալով Facebook սոցիալական ցանցի միջոցով որոշ քաղաքացիների կողմից հնչող սպառնալիքների վերաբերյալ Մարուքյանի հայտարարություններին՝ խորհրդարանական մեծամասնության ղեկավարը վստահություն է հայտնել, որ այդ գրառումները ոչ մեկի չեն վախեցնում:

ՀՀԿ-Ն ԱԿՏԻՎԱՆՈՒՄ Է
Հայաստանի Հանրապետական կուսակցությունը այսօր՝ հունվարի 18-ին` ժամը 18:00-ին, Գործադիր մարմնի նիստ է անցկացնելու: Նիստը վարելու է Սերժ Սարգսյանը: Տեղեկությունը «Հայկական ժամանակ»-ի հետ զրույցում փոխանցեց ՀՀԿ կազմակերպչական հարցերով հանձնաժողովի նախագահ Ռուբեն Թադեւոսյանը: Թադեւոսյանի փոխանցմամբ՝ նիստի օրակարգը ձեւավորվում է տեղում: Սա ՀՀԿ-ի 2019 թվականի առաջին ԳՄ նիստն է: ՀԺ-ի հարցին՝ արդյոք ԳՄ կազմի անդամների փոփոխություն լինելո՞ւ է, Թադեւոսյանն ասաց, որ ԳՄ կազմից դուրս է եկել միայն Սամվել Ֆարմանյանը: Արդեն տեղեկացրել էինք, որ նա ՀՀԿ-ից դուրս գալու դիմում է գրել: Նրա հետ ՀՀԿ-ից դուրս գալու դիմում էր գրել նաեւ Միհրան Հակոբյանը:

ՀԱՇՎԻ ԿԱՌՆԵՆ
ԱԺ Մարդու իրավունքների պաշտպանության եւ հանրային հարցերի մշտական հանձնաժողովի նախագահի թեկնածու Նաիրա Զոհրաբյանի խոսքով` այսօր ՀՀ-ում կա 91 ցմահ դատապարտյալ: Անդրադառնալով ցմահ ազատազրկվածների ներման ինստիտուտին` նա նշել է. «Մենք բազմիցս էս ամբիոնից խոսել ենք էդ խայտառակ հանձնաժողովի` վաղաժամկետ ազատ արձակման հանձնաժողովի մասին, որտեղ, կներեք, գիր-ղուշով, գալըչկայով որոշումներ են կայացրել, եւ սովորաբար որոշումները մերժել են»: Զոհրաբյանը նշել է, որ առաջիկայում հանդես են գալու օրենսդրական նախաձեռնությամբ, որ ներում շնորհելու գործընթացի ինչ-որ մի փուլում անպայմանորեն հաշվի առնվի նաեւ զոհի իրավահաջորդների մոտեցումը: