Նախարար Թորոսյանն ունի մի քիչ կոպտություն. Լուսինե Բադալյանը՝ նախագծի մասին

«Ժողովուրդ» օրաթերթը զրուցել է ԱԺ «Իմ քայլը» խմբակցության պատգամավոր Լուսինե Բադալյանի հետ` պարզելու համար, թե արդյոք իրենց խմբակցությունը պատրաստվում է կողմ քվեարկել «Ծխախոտային արտադրատեսակների եւ դրանց փոխարինիչների օգտագործման հետեւանքով առողջությանը հասցվող վնասի նվազեցման եւ կանխարգելման մասին» ՀՀ օրենքի նախագծին, որը օրերս շատ բուռն քննարկվել էր խմբակցության նիստում ՀՀ առողջապահության նախարար Արսեն Թորոսյանի հետ։

-Տիկի՛ն Բադալյան, օրերս ՀՀ առողջապահության նախարար Արսեն Թորոսյանի հետ Ձեր խմբակցությունը քննարկել է հանրությանը առավել հայտնի Հակածխախոտային նախագիծը, քննարկումը շատ թեժ մթնոլորտում է անցել: Արդյոք նախարարի հետ ունեցած հարցուպատասխանը Ձեզ բավարարո՞ւմ է, կո՞ղմ եք այդ նախածին:

-Նախագիծը հաստատ պետք է ունենալ, եւ ես ոչ միայն նախարարի հետ խոսելուց հետո, այլեւ մինչ այդ էլ վաղուց ծանոթ էի նախագծին: Ես կողմ եմ, ողջունում եմ նախագիծը ու կարծում եմ, որ պետք է այն անպայման ընդունենք: Երկար մտածել ենք, քննարկել ենք. իհարկե, ծխող մարդկանց շատ դժվար է համոզել, ինչ-որ բանով ստիպել, որպեսզի թողնեն ծխելը, բայց նախագիծն ավելի շատ միտված էր, որպեսզի նոր ծխողներ չավելանան: Զուտ եթե այս տեսանկյունից մոտենանք հարցին, նախագիծն ունի նաեւ կոնկրետ կետեր, կողմեր, որոնք խնդրահարույց են ու պետք է քննարկվեն, մշակման կարիք ունեն: Կան այնտեղ կետեր, որոնք ձեւակերպումների կարիք ունեն, որպեսզի բոլորի իրավունքները պաշտպանված լինեն, որեւիցէ մեկի իրավունք այնտեղ չխախտվի՝ լինի ներդրող, տնտեսվարող, թե ծխող մարդկանց: Այսինքն` այս տեսանկյունից մի քիչ, կարծում եմ, աշխատելու տեղ կա:

-Խմբակցությունում այս հարցի հետ կապված տարաձայնություն կա՞:

-Ես չեմ կարծում, որ խմբակցությունում կա մարդ, որը կարծում է, որ ծխելը վնասակար չէ առողջությանը: Բոլորն էլ կարծում են, որ պետք է պայքարել որքան հնարավոր է հանուն առողջ ապրելակերպի: Եվ, ընդհանուր առմամբ, մեր քաղաքական թիմը որդեգրել է այդ քաղաքականությունը. առողջ ապրելակերպն ամենաառանցքային կետերից մեկն է, որը միշտ մեր ուշադրության կենտրոնում է: Բայց այստեղ տարաձայնությունները դրա վերաբերյալ չեն:

-Ինչի՞ շուրջ են Ձեր խմբակցության անդամների տարաձայնությունները, ի՞նչն է նախագծում Ձեզ անհանգստացնում:

-Հիմնականում դրանք որոշ կետերի ձեւակերպումների առնչությամբ են առաջանում: Տնտեսական հատվածում, կարծեք թե, քննարկումների կարիք կա: Տարաձայնություն, որպես այդպիսին, ես գոնե չեմ նկատել: Ես նկատել եմ քննարկման անհրաժեշտություն: Այսինքն՝ ավելի շատ ոչ թե տարաձայնություն է, այլ քննարկման թեմա: Ես կարծում եմ, որ քննարկման արդյունքում կգանք որոշակի եզրակացության:

-Ըստ Ձեզ՝ նախարարը կգնա՞ ինչ-որ զիջումների իր նախագծում փոփոխություններ կատարելու: Քննարկումից ի՞նչ հասկացաք, զիջումներ կլինե՞ն, քանի որ, ըստ մեր տեղեկությունների, նախարարը վրդովվել է, երբ հասկացել է, որ ինչ-որ հատվածներ անհրաժեշտ է փոփոխության ենթարկել, ու կեսկատակ ասել է. «Ի՞նչ ասեմ, չեք ուզում, ծխեք, մեռեք»: Եղե՞լ է նման բան:

-Անկեղծ ասած՝ քննարկման ողջ ընթացքում ներկա եմ եղել, բայց այդ հատվածը վրիպել է ականջիցս: Ես նման բան չեմ լսել: Հաշվի առնելով նախարարի կատակասեր, մի քիչ ըմբոստ բնավորությունը՝ չեմ կարող ասել: Ենթադրություններ անել չեմ կարող, քանի որ, ամեն դեպքում, մեր նախարարը, իր բոլոր դրական կողմերով հանդերձ, ունի մի քիչ կոպտություն: Կարծիքների արտահայտման ժամանակ կա սրություն:

Համենայնդեպս, ես չեմ նկատել, որ գոնե այս նախագծի քննարկման ժամանակ այդպիսի սուր բաներ առաջանա: Լինում են, որ մենք՝ պատգամավորներս, առողջապահության նախարարի հետ ունենում ենք լրիվ հակադիր կարծիքներ, եւ դա բերում է որոշակի սրացման, բայց այս նախագծի ընթացքում կարծես թե ամեն ինչ հարթ է դեռեւս, քանի դեռ Տնտեսական հանձնաժողովն իր տեսակետը չի հայտնել: Հաշվի առնելով նախարարի բնավորությունը` մի քիչ կդժվարանամ ենթադրել, որ կգնա զիջումների, բայց միեւնույն ժամանակ պատգամավորներն էլ առանձնապես զիջող չեն:

Այսինքն՝ եթե այստեղ ինչ-որ խնդիր լինի, գոնե Ազգային ժողովի կողմից ամբիցիաների հարց չի լինի: Ցավոք, ընդհանուր առմամբ նախարարների կողմից ամբիցիաների հարցեր լինում են, ոչ այս թեմայի համար եմ ասում: Եթե Ազգային ժողովը գտնի, որ երկրի տնտեսության, հասարակության որոշակի խմբի հետ կապված կամ ոլորտային ինչ-որ խնդիրներ կան, մենք հաստատ կպայքարենք: Բայց նախագիծն, ընդհանուր առմամբ, ես դրական եմ գնահատում ու կարծում եմ, որ պետք է րոպե առաջ որոշակի սահմանափակումներ մտնեն այս հարցում, որպեսզի մենք կանխենք նոր ծխախոտ գնողներին:

-Տիկի՛ն Բադալյան, Ձեր խմբակցության ծխող պատգամավորները պատրա՞ստ են այն արգելքին, որը պետք է նախատեսվի օրենքով: Կարո՞ղ են պատգամավորներին արգելել ծխել, քանի որ մի խումբ պատգամավորներ արդեն բողոքի նոտա են հղում այդ առումով:

-Ինձ որեւէ մեկը չի կարող որեւէ բան արգելել: Ինձ կարող են համոզել, խորհուրդ տալ, բայց արգելել ծնվածս օրվանից որեւէ մեկը չի կարող որեւէ բան: Ես չգիտեմ՝ դա նախագծի խնդրահարույց մասն է, թե նախագծի մեկնաբանության խնդրահարույց մասն է, որն առաջին հայացքից որպես արգելք է դիտվում: Երբ ասում էի, որ կան սուր կողմեր նախագծում, սա դրանցից մեկն է: Ոչ միայն ես, այլեւ մեր քաղաքական թիմը, կարծում եմ, իր գործողություններով արդեն համոզվել է, որ դու չես կարող արգելել որեւէ մեկին որեւէ բան: Կարող են փաստարկներով համոզել, բայց արգելել…. Իսկ երբ խոսքը սկսվում է արգելելով, միանգամից ըմբոստություն է առաջանում: Դա նկատի ունեի, որ ասում էի, թե սուր մասեր կան նախագծում, որը պետք է մեղմել, թե չէ գաղափարը լավն է:

Զրուցեց ՍՈՆԱ ԳՐԻԳՈՐՅԱՆԸ