Նախազորակոչային տարիքի տղաները պատրաստվում են զինվորական ծառայության (ֆոտո)

Հունիսի 23-26-ը Թորոսգյուղի «Երեքնուկ» հանգստյան գոտում «Ախուրյան» երիտասարդական հասարակական կազմակերպության «Մարտունակ երիտասարդ՝ հզոր բանակ» ծրագրի շրջանակներում տեղի ունեցավ վրանային ճամբար։ Երեք ամիսների ընթացքում «Ախուրյան» ՀԿ-ն նախազորակոչային տարիքի տղաների շրջանում իրականացրել է նաև հանդիպում-քննարկումներ, տարաբնույթ միջոցառումներ, որոնց միջոցով երիտասարդներին և պատանիներին ներկայացվել են բանակի, ծառայության վերաբերյալ բոլոր մանրամասները։

Դասընթացներ են անցկացվել «Զինծառայության հիմնական էությունը», «Զինվորական կոլեկտիվը՝ որպես առանձնահատուկ կոլեկտիվի տեսակ և նրա առանձնահատկությունները», «Զինվորական կարգապահության ամրապնդման հիմնական մեթոդները», «Կոնֆլիկտների տեսակները և դրանց կանխարգելման, հաղթահարման ձևերը զինվորական կոլեկտիվներում», «Մարտարվեստի տիրապետումը՝ որպես ինքնապաշտպանության գրավական», «Մերօրյա հերոսները և նրանց կատարած սխրանքները» և այլ թեմաներով։

«Ախուրյան» ՀԿ ղեկավար Լևոն Իգիթյանը նշեց, որ ծրագրին մասնակցել է 40 երիտասարդ։ Վերջիններիս ընտրությունը կատարվել է փորձագետի և աշխատակազմի կողմից մշակված հարցաթերթիկների միջոցով։ Հիմնականում ընտրվել են այն տղաները, ովքեր թյուր տեղեկություններ են ունեցել բանակային կյանքի վերաբերյալ։ Լևոն Իգիթյանը նշեց, որ իրենց նպատակն է եղել երիտասարդների շրջանում սերմանել հայրենասիրություն, նախապատրաստել տղաներին՝ հայոց բանակում ծառայելու համար։

Դասընթացների և վրանային ճամբարի արդյունքում երիտասարդների ու պատանիների մոտ կոտրվել են որոշակի կարծրատիպեր։ ՀԿ նախագահը նշում է, որ նման ծրագրերն ավելի հաճախակի պետք է կազմակերպվեն՝ ընդգրկելով ավելի մեծ թիրախ խմբեր։

«Մարտունակ երիտասարդ՝ հզոր բանակ» ծրագիրն իրականացվել է ՀՀ նախագահի գործընկեր կազմակերպության՝ Հայաստանի երիտասարդական հիմնադրամի հայտարարած դրամաշնորհային մրցույթի շրջանակներում։