Գագիկ Ծառուկյանը փորձե՞լ է միջամտել Ալեքսանդր Լապշինի արտահանձնման գործընթացին

Արդեն հայտնել էինք, որ երեկ ռուս բլոգեր Ալեքսանդր Լապշինը Բելառուսի կողմից արտահանձնվել է Բաքվին: ArmLur.am-ը  Գագիկ Ծառուկյանի մամուլի խոսնակ Իվետա Տոնոյանից հետաքրքրվեց, թե Ծառուկյանն արդյոք փորձե՞լ է միջամտել Լապշինի  արտահանձնմանը՝ հաշվի առնելով Բելառուսի նախագահի և Գագիկ Ծառուկյանի անձնական կապերը։

«Այս օրերին այս հարցը իսկապես շատ է շահարկվում, սակայն ուզում եմ շեշտել, որ տարբեր շրջանակների կողմից նման հարցադրումը կամ խնդրին չտիրապետելու կամ պարզ ուղղորդվածության միտում ունի։ Ոչ մեկի համար էլ գաղտնիք չէ, որ նման խնդիրները չեն քննարկվում և առավել ևս՝ չեն լուծվում անձնական կապերի համատեքստում։ Սա բացառապես միջպետական հարաբերությունների դաշտ է։ Լապշինի խնդիրը պետք է քննարկվի ԱԳՆ խողովակներով, խորհրդարանական դիվանագիտության և կամ այլ միջազգային ձևաչափերում», – նշեց նա։

Տոնոյանը հիշեցրեց, որ  խոսքը ՌԴ քաղաքացու մասին է և ընդգծեց, որ որքանով տեղյակ է` Ռուսաստանի արտաքին գործերի նախարարությունը բավական ակտիվ զբաղվում է խնդրով։ «Իսկ անձնական կապերով կամ անձնական հեղինակությամբ կարելի է այլ պետություններից ավելի մեծ թվով գործիչների, տարբեր շրջանակների ներկայացուցիչների հրավիրել Արցախ։ Ինչն էլ, հավատացնում եմ Ձեզ, Գագիկ Ծառուկյանը անպայմանորեն կիրականացնի»,- հավելեց նա։