ՏԵՍԱՆՅՈՒԹ․ Կենտրոնի թաղապետի ենթակաների կողմից կաշառք վերցնելու գործով վկային բերման կենթարկեն. փաստաբան Հայկ Ալումյանը՝ դատարանում առկա վիճակի մասին

ArmLur.am-ը զրուցել է փաստաբան Հայկ Ալումյանի հետ՝ Կենտրոնի թաղապետարանի պաշտոնյաների քրեական գործով դատարանում տիրող իրավիճակի մասով։

Մեղադրյալներին չեն կարողանում բերել դատարան, եւ, դեռ ավելին, վկային բերման ենթարկելու որոշում է կայացվել, սակայն վկային էլ չեն կարողանում բերել դատարան։

Հավելենք, որ Կենտրոնի թաղապետարանի պաշտոնյա Տիգրան Մարտիրոսյանի նկատմամբ խափանման միջոց է ընտրվել տնային կալանք։

Հիշեցնենք, որ իրավապահները կալանավորել են Երեւան քաղաքի Կենտրոն վարչական շրջանի ղեկավարի աշխատակազմի կոմունալ տնտեսության եւ բազմաբնակարան շենքերի կառավարման մարմինների հետ աշխատանքների կազմակերպման բաժնի պետ Տիգրան Ռաֆիկի Մարտիրոսյանին, նույն բաժնի առաջատար մասնագետ Արման Նվերի Հարությունյանին:

Ըստ նախաքննական մարմնի պաշտոնական տեղեկության՝ վերջիններս նախնական համաձայնությամբ, խմբի կազմում, ունենալով տեղական ինքնակառավարման մարմնի անունից հանդես գալու լիազորություն, ինչպես նաեւ նույն մարմնի անունից իրավունք, պարտականություն կամ պատասխանատվություն առաջացնող գործառույթներ, հանդիսանալով պաշտոնատար անձինք, Երեւան քաղաքի Կենտրոն վարչական շրջանի՝ հրատապ լուծում պահանջող ընթացիկ աշխատանքներն իրականացնող «Ասֆալտ Քոնսթրաքշն» ՍՊ ընկերության տնօրեն Կամո Գերասիմի Գեւորգյանի նկատմամբ իրենց ծառայողական լիազորությունների իրականացման հետ կապված ընդհանուր բերեհաճ վերաբերմունքի համար 2023 թվականի հուլիսի 11-ին Երեւան քաղաքի Կենտրոն վարչական շրջանի աշխատակազմի վարչական շենքում Կամո Գեւորգյանից ստացել են խոշոր չափերով՝ 1.000.000 (մեկ միլիոն) ՀՀ դրամ կաշառք-գումար, որը վերջինս անձամբ տվել է Տիգրան Մարտիրոսյանին, որը ստացված կաշառք-գումարից 150.000 դրամը հաջորդ օրը փոխանցել է Արման Հարությունյանին։

Նկատենք, որ նախաքննական մարմինը պատասխանատվության չի կանչել Կենտրոնի թաղապետ Սամվել Ղուկասյանին այն բանի համար, թե ինչպես եղավ, որ նրա ենթակաները, առանց իր իմացության, նման պատժելի քայլի գնացին»։

Քնար Մանուկյան