ՏԵՍԱՆՅՈՒԹ․ Ի՞նչ որոշում կկայացվի Նուարդ Վարդանյանի սխալ հայտարարագրի վերաբերյալ. նոր մանրամասներ

Երևանի ավագանում ՔՊ խմբակցության ավագանու անդամ Նուարդ Վարդանյանի սխալներով լրացրած հայտարարագրի տարբեր տարեթվերով նույն մեքենան այս տարի անհետացել է հայտարարագրից: Բանն այն է, որ Նուարդ Վարդանյանը 2021թ. հայտարարագրում նշել էր, որ 2022 թվականին ձեռք է բերել 2018 թվականի արտադրության Ford մակնիշի մեքենա։ Նույն 2021թ. հայտարարագրի համաձայն՝ Վարդանյանը Դավիթ Ավինյանից ձեռք էր բերել եւս մեկ Ford՝ 2018 թվականի արտադրության, եւ տարվա վերջի դրությամբ հայտարարագրել է 2 Ford մակնիշի մեքենա։

2022թ. սկզբում ոչ միայն «անհետացել է» Ford-երից մեկը, այլեւ վաճառքից առաջ փոխվել է մյուս Ford-ի տարեթիվը` 2018 թվականի արտադրությունը դառնալով մեկ տարով նոր` 2019 թվականի արտադրության։ Ստացվում է, որ Նուարդ Վարդանյանը իրեն պատկանող Ford մակնիշի մեքենան, որը ձեռք է բերել 2018 թվականին 4 մլն դրամով՝ գրեթե 10 հազար ԱՄՆ դոլար, 2022 թվականին վաճառել է 13 հազար ԱՄՆ դոլարով որպես 2019 թվականի արտադրության մեքենա։

Այս դեպքից հետո Կոռուպցիայի կանխարգելման հանձնաժողովը ուսումնասիրություն էր սկսել, ապա ավագանու անդամից պարզաբանում էր հայցել։ «Քաղաքացիական պայմանագիր» խմբակցության ավագանու անդամ Նուարդ Վարդանյանը չի ներկայացրել պարզաբանում իր հայտարարագրում առկա անհամապատասխանությունների վերաբերյալ։

Ինքը՝ Վարդանյանը, ArmLur.am-ի հետ զրույցում նշել էր. «Ընդհանրապես էդ հայտարարագիրը ոտքից գլուխ ամբողջը սխալ է։ Ես իրենց (Կոռուպցիայի կանխարգելման հանձնաժողով) նամակով էլ եմ դիմել, որ ուղղեն։ Իրենք չեն ուղղել, եւ դա իմ սխալմունքը չէ»։

Ինչևէ, սպասենք Կոռուպցիայի կանխարգելման հանձնաժողովի քայլերին։

Նուարդ Վարդանյանի հայտարարագրից անհետացել են ոչ միայն մեքենաները, այլ նաև նվիրատվություն ստացած 3 գույքից 2-ը՝ անհատական բնակելի տունը և նվիրատվությամբ ստացած ևս մեկ շինություն, որը Հայաստանի Հանրապետության օրենսդրության համաձայն նոր կառուցված, ձեռք բերված և անշարժ գույքի կադաստր վարող լիազոր մարմնի կողմից հաշվառված ու գնահատված այն շինությունը, որը դեռ չի ստացել իրավունքների պետական գրանցում։

Հետաքրքիր է, թե ուր է անհետացել Նուարդ Վարդանյանի մեքենան և անշարժ գույքը, եթե հայտարարագրում նույնիսկ վաճառքի մասին ոչ մի տվյալ չկա։

ArmLur.am-ը դիմեց Կոռուպցիայի կանխարգելման հանձնաժողով՝ իմանալու, թե պարզաբանում չներկայացնելուց հետո ինչ ընթացք է տվել այս գործին հանձնաժողովը, սակայն ArmLur.am-ին խնդրեցին հարցում ուղարկել։

Մանրամասները՝ տեսանյութում։

Էմմա Միքայելյան