Պաշտպանության նախարարի խորհրդականը աղմկահարույց կրակոցների հետևանքով հրաժարական տվեց․ որդին բանտում է

ArmLur.am-ի տեղեկությունների համաձայն, Սուրեն Պապիկյանի խորհրդական Արտակ Տոնոյանը ազատվել է պաշտոնից։

Իսկ ի՞նչն է պատճառը։

Հիշեցնենք, որ օգոստոսի 13-ին Կոտայքի մարզում կրակոցներ էին հնչել, ինչի հետևանքով սպանվեց մեկ անձ։ Կրակոցներից առաջ տեղի է ունեցել խնջույք, որին մասնակցել է Մամիկոն Դավթյանը։ Խնջույքի ընթացքում մասնակիցների միջև ծագել է վիճաբանություն, որի ժամանակ ծեծի են ենթարկել Անդրանիկ Կիրակոսյանին։

Հաջորդ օրը՝ օգոստոսի 14-ին, միջադեպի մասնակիցները պայմանավորվել են հանդիպել Երևան–Աշտարակ գլխավոր ավտոճանապարհի դեպի Պռոշյան գյուղ տանող կամրջի տակ՝ պարզաբանելու, թե ով ում է ծեծել։

Արդյունքում, հանդիպում-պարզաբանումը ճակատագրական է դարձել Մամիկոն Դավթյանի համար․ նա վիրավորվել է և այսօր մահացել հիվանդանոցում։

Ավելին, լուրեր կան, որ կրակոցների գործով անցնում է հայտնի գեներալի որդին։ Եվ ահա պարզվում է, որ գեներալը Պաշտպանության նախարարի խորհրդական Արտակ Տոնոյանի որդին Արտաշես Տոնոյանն է, որը այս պահին կալանավորված է և գտնվում է Նուբարաշենի բանտում։

Հիշեցնենք, որ օգոստոսի 14-ի առավոտյան կրակոցներ էին հնչել Կոտայքի մարզում՝ «Չաղ Ռուստամ» մականվամբ քրեական հեղինակության տան մոտ գտնվող կամրջի տակ։ Մեր թղթակիցը տեղեկացնում է, որ եղել է երկու վիրավոր։ Shamshyan.com-ի տեղեկություններով՝ վիրավորներից մեկը Պռոշյանի բնակիչ, 24-ամյա Մամիկոն Դավթյանն է, ով երբեք քրեական պատմությունների մեջ չի եղել և համարվում էր գյուղի համեստ ու առաքինի բնակիչ։ Շատերը զարմացած են, թե ինչու և ով կարող էր կրակել նրա վրա։ Նրա ընտանիքը ևս միշտ ապրել է արդար քրտինքով վաստակած հացով։

Նկատենք, որ Պաշտպանության նախարարի խորհրդականներն ու կամ նրանց հարազատները վերջին շրջանում կրիմինալի մեջ են։ Օրերս հայտնել էինք, որ կալանավորվել էր նաև նախարարի խորհրդական Արշակ Օրդուխանյանը։