ԱԺ ՀՀԿ խմբակցության ղեկավար, ԱԺ նախագահի թեկնածու Գալուստ Սահակյանից այսօր լրագրողները հետաքրքրվեցին` արդյոք ԱԺ նախագահ դառնալուց հետո փոխելու է իր իմիջը, նոր կոստյումներ գնելու է:
Սահակյանն ասաց. «Ես տասը տարվա կոստյում էլ ունեմ, որովհետև շատ նրբանկատ եմ հագուստի նկատմամբ: Բնավորությունս փոխելու եմ, ավելի դաժան եմ դառնալու, լրագրողների երեսին չեմ նայելու»:
Լրագրողները հետաքրքրվեցին, թե արդյոք հնարավոր է ԱԺ նախագահ դառնալու հանգամանքը հիմք դառնա Գալուստ Սահակյանի համար 2018-ի նախագահական ընտրություններում նախագահի թեկնածու առաջադրվելու համար: «Ինձ ուրիշների տեղը մի՛ դրեք»,- պատասխանեց քաղաքական գործիչը` հավելելով, որ ինքը որևէ պաշտոնի հավակնություն չունի:
Ի դեպ, ԱԺ նախագահի թեկնածու Գալուստ Սահակյանը, հնարավոր է, չթողնի իր բնակարանը և տեղափոխվի Պռոշյան փողոցում գտնվող ամառանոց:
Անդրադառնալով ՀՀԿ խմբակցության ղեկավարի պաշտոնը ղեկավարելուն` Սահակյանն ասաց. «Այսպես թե այնպես, ես նաև կուսակցության փոխնախագահն եմ ու մասնակից եմ լինելու խմբակցության աշխատանքներին, բայց դա չի նշանակում, որ ես «խմբակցության ղեկավար» անվանումը պետք է ունենամ, որովհետև եթե ընտրվեմ, ես ոչ միայն ՀՀԿ խմբակցության նախագահն եմ լինելու, այլև՝ ամբողջ խորհրդարանի»:
Քաղաքական գործիչը նաև ասաց, որ ինքն իրեն վատ կզգա, եթե մյուս խմբակցությունները չմասնակցեն քվեարկությանը:
«Ես չեմ կարծում, որ իմ անձի նկատմամբ նման վերաբերմունք կլինի»,- ասաց նա` հավելելով, որ ինքը պատրաստ է ցանկացած հարցի շուրջ քննարկումներ սկսել 4 ոչ իշխանական խմբակցությունների հետ:
Սոնա Դավթյան
.gif)
