Դատարանը չբավարարեց Արման Սարոյանի՝ նիստը դռնփակ անցկացնելու միջնորդությունը

Արման Սարոյանը միջնորդեց դատավոր Սերժ Ռուշանյանին դռնփակ անցկացնել Ամենայն Հայոց կաթողիկոսի և վեց Սրբազանների քրեական գործով նիստը՝ նշելով, որ իր դեմ «ուղղորդված մեդիա արշավ կա»։

Դատարանը մերժեց միջնորդությունը․ նիստը կանցկացվի դռնբաց։

Հիշեցնենք, որ Վեհափառ Հայրապետի և Հայ Առաքելական Սուրբ Եկեղեցու 6 Սրբազանների վերաբերյալ քրեական գործը հուլիսի 27-ին մուտք է եղել դատարան։ Գործը մակագրվել էր Արմավիրի մարզի առաջին ատյանի դատարանի դատավոր Հակոբ Մանուկյանին, որը օգոստոսի 7-ին ինքնաբացարկ էր հայտնել։

Նրանց նկատմամբ ընտրվել է բացակայելու արգելք խափանման միջոցը, իսկ մեղադրանք է առաջադրվել ՔՕ 507-րդ հոդվածի 2-րդ մասով։

Քրեական գործը կապված է Արման Սարոյանի՝ իրեն Մասյացոտնի թեմակալ առաջնորդի պաշտոնում վերականգնելու պահանջով ներկայացրած հայցի հետ։ Ըստ մեղադրանքի՝ Վեհափառ Հայրապետը և 6 Սրբազանները չեն կատարել դատարանի միջանկյալ որոշումը՝ Արման Սարոյանին թեմակալ առաջնորդի պարտականությունները կատարելու հնարավորություն ապահովելու վերաբերյալ։