Հյուսիսային Կիպրոսի ափերի մոտ կիրակի՝ օգոստոսի 30-ին, շուրջ 270 ուղևոր և անձնակազմի անդամ տեղափոխող լաստանավ է շրջվել։ Դեպքի հետևանքով առնվազն 8 մարդ զոհվել է, ևս 18-ը համարվում են անհետ կորած։ Փրկարարները կարողացել են փրկել 241 մարդու։
Մասնավոր լաստանավը Կիրենիա նավահանգստից դուրս է եկել տեղական ժամանակով ժամը 12:30-ին և անմիջապես սկսել է սուզվել։ Դեպքի պատճառը դեռևս հայտնի չէ։ Լաստանավը ուղևորվում էր դեպի Թուրքիայի արևելյան Միջերկրական ծովի ափին գտնվող Թաշուջու նավահանգիստ։
Լաստանավում ընդհանուր առմամբ եղել է 267 մարդ՝ 259 ուղևոր և անձնակազմի 8 անդամ։ Դեպքը տեղի է ունեցել Կիրենիայի ափերի անմիջական հարևանությամբ։ Տարածքը հայտնի է որպես զբոսաշրջային կենտրոն, իսկ նման լաստանավերը ամեն օր կապ են ապահովում Հյուսիսային Կիպրոսի և Թուրքիայի միջև։
Դեպքից հետո լաստանավի շրջված կորպուսի վրա մարդիկ են մնացել՝ փրկարարական բաճկոններով։ Նրանց ափ հասցնելու համար գործողությանը ներգրավվել են առափնյա պահպանության և քաղաքացիական նավեր, ինչպես նաև ուղղաթիռներ։
Հյուսիսային Կիպրոսի իշխանությունները հայտնել են, որ լաստանավի նավապետը և անձնակազմի 7 անդամները ձերբակալվել են՝ հարցաքննության նպատակով։ Ավելի ուշ նավը ամբողջությամբ խորտակվել է և նստել ծովի հատակին՝ 514 մետր խորության վրա։ Որոնողափրկարարական աշխատանքներին պետք է միանան նաև Թուրքիայի ջրասուզակները։
Հյուսիսային Կիպրոսի թուրքական հատվածի ղեկավար Թուֆան Էրհյուրմանը հայտարարել է, որ որոնողափրկարարական աշխատանքները շարունակվելու են այնքան ժամանակ, մինչև բոլոր անհետ կորածներին գտնեն։
Նա նաև նշել է, որ նախորդ օրը՝ շաբաթ օրը, Կիպրոսում ուժեղ փոթորիկներ էին, որոնց հետևանքով կղզու հարավ-արևելքում մեկ մարդ զոհվել էր։ Սակայն, նրա խոսքով, կիրակի օրը եղանակային պայմանները համարվել են նավարկության համար բարենպաստ։
Թուրքիայի նախագահ Ռեջեփ Թայիփ Էրդողանը ցավակցություն է հայտնել զոհվածների ընտանիքներին և նշել, որ անհետ կորածներին որոնելու աշխատանքները շարունակվում են։ Օգնություն և ցավակցություն է հայտնել նաև Կիպրոսի միջազգայնորեն ճանաչված կառավարությունը։
Անի Վարդանյան
.gif)
