Ֆրանսիայի նախագահ Էմանուել Մակրոնը կոչ է արել Եվրոպային առաջիկա տասը տարիների ընթացքում զարգացնել սեփական օդաչուավոր տիեզերական թռիչքների ծրագիրը։
Մակրոնը նման հայտարարություն է արել Փարիզում անցկացվող միջազգային տիեզերական գագաթնաժողովի ժամանակ՝ ընդգծելով, որ Եվրոպայի տիեզերական ծրագիրը դեռևս խոցելի է և անհրաժեշտ է մեծացնել ներդրումները։
Նրա ներկայացրած ծրագրով՝ երկու տարվա ընթացքում եվրոպական «Nyx» բեռնատար պարկուճը պետք է միանա Միջազգային տիեզերակայանին, հինգ տարվա ընթացքում «Argonaut» լուսնային սարքը պետք է վայրէջք կատարի Լուսնի վրա, իսկ տասը տարվա ընթացքում Կուրուից պետք է մեկնարկի առաջին եվրոպական օդաչուավոր պարկուճը՝ եվրոպացի և այլ երկրների տիեզերագնացներով։
Եվրոպական տիեզերական գործակալության ղեկավար Յոզեֆ Աշբախերը նշել է, որ նման անկախ կարողություններ ստեղծելու համար առաջիկա տասը տարիներին անհրաժեշտ կլինի տարեկան շուրջ 1 մլրդ եվրոյի ներդրում։
Եվրոպան մինչ այժմ օդաչուավոր տիեզերական առաքելություն ինքնուրույն չի իրականացրել և տիեզերագնացների թռիչքների համար հիմնականում ապավինել է Ռուսաստանի և ԱՄՆ-ի հնարավորություններին։
Անի Վարդանյան
.gif)
