Հայկական արմատներով քանթրի երգչուհին և ԱՄՆ Հետաքննությունների դաշնային բյուրոյի՝ FBI-ի տնօրեն Քաշ Պատելը նշանադրվել են։ 27-ամյա Ալեքսիս Ուիլկինսն ու 46-ամյա Պատելը նշանադրության մասին հայտնել են հոկտեմբերի 4-ին։ Ուիլկինսը սոցիալական ցանցերում հրապարակել է իրենց համատեղ լուսանկարը՝ ցուցադրելով նշանադրության մատանին։
Ալեքսիս Ուիլկինսը ամերիկացի քանթրի երգչուհի, երգերի հեղինակ և քաղաքական մեկնաբան է։ Նա ծնվել է Բոստոնում, մեծացել է Արկանզասում, իսկ մանկության տարիների մի հատվածն անցկացրել է նաև Անգլիայում և Շվեյցարիայում։ Հրապարակված կենսագրական տվյալների համաձայն՝ Ուիլկինսը հայկական ծագում ունի։
Երաժշտությամբ Ուիլկինսը զբաղվում է դեռ պատանեկան տարիքից։ 2023 թվականին նա թողարկել է իր առաջին EP-ն՝ «Grit»։ Երաժշտական գործունեությունից բացի՝ նա հայտնի է նաև որպես քաղաքական մեկնաբան և պահպանողական շրջանակների հետ կապված հանրային դեմք։
Իսկ Քաշ Պատելը ԱՄՆ-ի իրավապահ համակարգի ամենաբարձր պաշտոնյաներից մեկն է։ Նա 2025 թվականի փետրվարին ստանձնել է FBI-ի տնօրենի պաշտոնը՝ դառնալով բյուրոյի իններորդ տնօրենը։ FBI-ի տնօրենը նշանակվում է ԱՄՆ նախագահի կողմից և հաստատվում Սենատի կողմից։
FBI-ն ԱՄՆ արդարադատության նախարարության հիմնական քննչական կառույցն է և միաժամանակ երկրի հետախուզական համայնքի լիիրավ անդամ։ Բյուրոն զբաղվում է ինչպես ծանր հանցագործությունների, այնպես էլ ազգային անվտանգության սպառնալիքների, ահաբեկչության, հակահետախուզության, կիբերհանցագործությունների, կազմակերպված հանցավորության, կոռուպցիայի և մի շարք այլ ոլորտների հետաքննությամբ։ FBI-ն իր քննչական լիազորությունները բնութագրում է որպես ԱՄՆ դաշնային իրավապահ մարմինների շարքում ամենալայններից։
Բյուրոյի համակարգում աշխատում է մոտ 38 հազար մարդ, այն ունի 56 դաշտային գրասենյակ, ավելի քան 350 փոքր գրասենյակ և ավելի քան 60 արտասահմանյան կապի գրասենյակ։ Այս կառույցը նաև համագործակցում է ԱՄՆ այլ իրավապահ և հետախուզական կառույցների հետ։
Պատելը նախկինում աշխատել է նաև ԱՄՆ արդարադատության նախարարությունում, Ազգային անվտանգության խորհրդում, Պաշտպանության նախարարությունում և Ազգային հետախուզության տնօրենի տեղակալի պաշտոնում։ FBI-ի պաշտոնական կենսագրության համաձայն՝ նա զբաղվել է ահաբեկչության դեմ պայքարի, ազգային անվտանգության և հետախուզական հարցերով։
Պատելն ու Ուիլկինսը ծանոթացել են Նեշվիլում 2022 թվականին, իսկ հարաբերություններ են սկսել 2023 թվականին։ Ուիլկինսը ներկա է եղել նաև Պատելի՝ FBI-ի տնօրենի պաշտոնում երդման արարողությանը 2025 թվականի փետրվարին։
Այսպիսով, ամերիկյան լրատվամիջոցների ուշադրության կենտրոնում հայտնված զույգը միավորում է ամերիկյան իրավապահ համակարգի ամենաբարձր պաշտոնյաներից մեկին և հայկական արմատներով երիտասարդ քանթրի երգչուհու։
Անի Վարդանյան
.gif)
