Էկվադորի Գուայաքիլ նավահանգստային քաղաքում կաթոլիկ քահանա է մահացել պատարագ մատուցելու ընթացքում, երբ եկեղեցու խորանի վերևում ամրացված ծանր փայտե խաչը պոկվել և ընկել է նրա վրա։ Դեպքը հեռարձակվում էր ուղիղ եթերով, իսկ տեսանյութը լայնորեն տարածվել է սոցիալական ցանցերում։
Դեպքը տեղի է ունեցել շաբաթ օրը՝ «Տիրամայր Հավերժական օգնության» եկեղեցում։ Հայր Պատրիսիո Սանչեսը պատարագ էր մատուցում, երբ խորանի վերևում պատին ամրացված խաչը հանկարծակի պոկվել է և հարվածել նրա գլխին։
Սոցիալական ցանցերում տարածված տեսանյութում երևում է, թե ինչպես է խաչն ընկնում քահանայի վրա։ Եկեղեցում գտնվող հավատացյալները սարսափահար օգնություն են կանչում։ «Հա՛յր, հա՛յր, շտապօգնությո՛ւն կանչեք»,- լսվում է տեսանյութում, որից հետո ուղիղ հեռարձակումը հանկարծակի ընդհատվում է։
Գուայաքիլի արքեպիսկոպոսությունը ցավակցություն է հայտնել քահանայի ընտանիքին և մտերիմներին՝ հայտարարելով, որ իրենք կիսում են նրանց վիշտը և իրենց սերն ու աջակցությունն են հայտնում այս ծանր պահին։
Եկեղեցական պաշտոնյաները չեն մեկնաբանել, թե ինչու է խաչը պոկվել պատից։ Տեղական իշխանությունները նույնպես դեպքի վերաբերյալ հրապարակային հայտարարություն չեն արել, և պատահարի պատճառը դեռևս հայտնի չէ։
Գուայաքիլը Էկվադորի գլխավոր առևտրային նավահանգիստն է։ Այն գտնվում է երկրի մայրաքաղաք Կիտոյից մոտ 265 կիլոմետր հարավ-արևմուտք։
.gif)
