Պուտին-Թրամփ համաձայնությունից հետո առաջին ռուսական դիզելային տանկերը ուղևորվել են Նյու Յորք

Ռուսական դիզելային վառելիքով բեռնված առաջին տանկերը շարժվում է դեպի Նյու Յորք՝ ԱՄՆ նախագահ Դոնալդ Թրամփի և Ռուսաստանի նախագահ Վլադիմիր Պուտինի միջև ձեռք բերված պայմանավորվածությունից հետո։ Reuters-ի տվյալներով՝ հոկտեմբերի 22-ին «Ագիոի Ֆանենդես» նավը Ռուսաստանի Պրիմորսկ նավահանգստում բեռնել է 40 հազար տոննա ցածր ծծմբայնությամբ դիզելային վառելիք։ Նավը ԱՄՆ պետք է հասնի նոյեմբերի 7-ին։

Թրամփը հայտարարել է ռուսական դիզելային վառելիքի մատակարարումների վերսկսման մասին, իսկ ԱՄՆ ֆինանսների նախարարությունը թույլատրել է դրա վաճառքն ու ներմուծումը մինչև 2027 թվականի ապրիլի 7-ը։ Ռուսաստանի փոխվարչապետ Ալեքսանդր Նովակի խոսքով՝ մինչև տարեվերջ երկիրը կարող է դիզելային վառելիքի արտահանումը հասցնել ամսական 3-3,5 միլիոն տոննայի։

Ռուսաստանի վառելիքի արտահանումը վերջին շրջանում նվազել է Ուկրաինայի անօդաչու թռչող սարքերի հարվածների, նավթավերամշակման գործարանների աշխատանքի խափանումների և ներքին շուկան պաշտպանելու նպատակով սահմանված սահմանափակումների պատճառով։ Միջազգային էներգետիկ գործակալության տվյալներով՝ հունիսին Ռուսաստանում նավթի վերամշակման ծավալը նվազել է մինչև օրական 3,8 միլիոն բարել՝ ավելի քան 20 տարվա նվազագույն մակարդակը։

Գործարքը քննադատության է արժանացել Ուկրաինայի և ամերիկացի որոշ օրենսդիրների կողմից։ Նրանք մտահոգություն են հայտնել, որ ռուսական վառելիքի գնումների վերսկսումը Մոսկվային լրացուցիչ եկամուտներ կապահովի՝ Ուկրաինայի դեմ պատերազմի շարունակության պայմաններում։