ԱՄՆ-ում այսօր միջանկյալ ընտրություններ են․ ի՞նչ է որոշվելու և ինչ սպասել

Այսօր՝ նոյեմբերի 3-ին, ԱՄՆ-ում անցկացվում են միջանկյալ ընտրություններ, որոնց արդյունքներով որոշվելու է՝ արդյոք նախագահ Դոնալդ Թրամփի Հանրապետական կուսակցությունը կպահպանի՞ վերահսկողությունը Կոնգրեսի երկու պալատներում, թե՞ դեմոկրատները կկարողանան փոխել ուժերի հարաբերակցությունը։

Reuters-ի փոխանցմամբ՝ ընտրությունների գլխավոր պայքարը ծավալվում է Ներկայացուցիչների պալատի և Սենատի վերահսկողության համար։ Հարցումները և անկուսակցական վերլուծաբանների գնահատականները դեմոկրատներին առավելություն են տալիս Ներկայացուցիչների պալատի պայքարում, մինչդեռ Սենատի հարցում արդյունքն ավելի անորոշ է։

Այսօր ընտրությունների են ներկայացված Ներկայացուցիչների պալատի բոլոր 435 տեղերը, ինչպես նաև Սենատի 100 տեղերից 35-ը։ Դեմոկրատներին Ներկայացուցիչների պալատում մեծամասնություն ստանալու համար անհրաժեշտ է հանրապետականներից առնվազն երեք տեղ խլել, իսկ Սենատում վերահսկողությունը փոխելու համար՝ չորս տեղ։

Ընտրությունների արդյունքները կարևոր են լինելու Թրամփի հետագա քաղաքականության համար։ Եթե դեմոկրատները մեծամասնություն ստանան Կոնգրեսի պալատներից մեկում կամ երկուսում, նրանք հնարավորություն կունենան ուժեղացնել վերահսկողությունը նախագահի վարչակազմի նկատմամբ, հետաքննություններ սկսել և օրենսդրական նախաձեռնությունների ընդունման հարցում ավելի մեծ ազդեցություն ունենալ։ Սենատում մեծամասնություն ստանալու դեպքում դեմոկրատները նաև կկարողանան արգելափակել նախագահի առաջադրած որոշ պաշտոնյաների, այդ թվում՝ Գերագույն դատարանի դատավորների թեկնածությունները։

Reuters-ը նշում է, որ Թրամփի և հանրապետականների համար ընտրապայքարը բարդացել է տնտեսական խնդիրների պատճառով։ Ընտրողների հիմնական մտահոգություններից են կենսապահովման ծախսերը, գնաճային ճնշումները և Իրանի դեմ պատերազմի հետևանքով վառելիքի գների աճը։ Թրամփի վարկանիշը ևս մոտենում է իր ամենացածր ցուցանիշներին։

Որտե՞ղ է սպասվում ամենաթեժ պայքարը

Սենատի համար կարևոր մրցապայքար է ընթանում Միչիգանում, Ալյասկայում, Տեխասում, Կանզասում, Մեյնում, Այովայում, Նեբրասկայում, Օհայոյում և Հարավային Կարոլինայում։ Դրանց մեծ մասը հանրապետականների ավանդական հենակետերն են։

Միչիգանում դեմոկրատ Աբդուլ Էլ-Սայեդը մրցում է հանրապետական Մայք Ռոջերսի հետ։ Մրցապայքարը լրացուցիչ ուշադրության է արժանացել այն բանից հետո, երբ դեմոկրատ Հեյլի Սթիվենսը, որը պարտվել էր կուսակցական նախնական ընտրություններում, աջակցություն է հայտնել հանրապետական թեկնածուին։

Տեխասում դեմոկրատ Ջեյմս Թալարիկոն փորձում է հաղթել հանրապետական Քեն Փաքսթոնին։ Կանզասում դեմոկրատ Ադամ Հեմիլթոնը մրցում է հանրապետական սենատոր Ռոջեր Մարշալի հետ։

Բացի Կոնգրեսի ընտրություններից, այսօր անցկացվելու են նաև նահանգապետերի շուրջ երեք տասնյակ ընտրություններ, նահանգային օրենսդիր մարմինների ընտրություններ և տարբեր հանրաքվեներ։

Այսպիսով, նոյեմբերի 3-ի ընտրությունները դիտարկվում են որպես Թրամփի նախագահության առաջին երկու տարիների քաղաքական գնահատական։ Դրանց արդյունքները ցույց կտան՝ հանրապետականները կպահպանե՞ն արդյոք Կոնգրեսի վերահսկողությունը, թե՞ դեմոկրատները կկարողանան սահմանափակել Սպիտակ տան քաղաքական ազդեցությունը։

Անի Վարդանյան