ԱՄՆ Փենսիլվանիա նահանգի 60-ամյա բնակիչ Գլենվուդ Հոսկին կրտսերը Գինեսի համաշխարհային ռեկորդ է սահմանել՝ մեկ տարվա ընթացքում կինոթատրոններում դիտելով 1207 ֆիլմ։
Ինչպես հայտնում է UPI-ին, սա օրական միջինը 3.3 ֆիլմ է կազմում։
Հոսկինի խոսքով՝ ռեկորդի մասին տեղեկացել է համացանցում որոնումներ կատարելիս։ Նա նկատել է, որ նույն ֆիլմի ամենաշատ կինոդիտումների ռեկորդը՝ 292 դիտում, իր համար անհասանելի է, ուստի որոշել է փորձել սահմանել մեկ տարվա ընթացքում կինոթատրոնում ամենաշատ ֆիլմ դիտելու ռեկորդը։
Նա ռեկորդային փորձը սկսել է 2024 թվականի ապրիլին և ավարտել 2025 թվականի ապրիլին՝ այդ ընթացքում դիտելով 1207 ֆիլմ։ Ամեն օր նա նախ ուսումնասիրել է կինոթատրոնների ցուցադրությունների ժամանակացույցը, ապա պլանավորել դիտումները՝ սկսած վաղ առավոտից մինչև կեսգիշեր։
Մինչ այդ ռեկորդը պատկանում էր Զաքարիա Սուոփին, որը մեկ տարվա ընթացքում դիտել էր 777 ֆիլմ։ Հոսկինին հաջողվել է զգալիորեն գերազանցել այդ ցուցանիշը։
Նա նշել է, որ որոշ ֆիլմեր հաճելիորեն զարմացրել են իրեն։ Դրանց թվում է «Վայրի ռոբոտը» (The Wild Robot) անիմացիոն ֆիլմը, որը, նրա սպասումներից ավելի լավն է եղել։ Հոսկինը հավանել է նաև «Դեդփուլը և Վուլվերինը» (Deadpool & Wolverine) ֆիլմը։
Ամերիկացին նշել է, որ հաճույք է ստացել տնից դուրս ժամանակ անցկացնելուց, քանի որ միշտ սիրել է մարտահրավերներն ու նպատակներ սահմանելը։
Ա․ Վարդանյան
.gif)
