Քաղբանտարկյալ Տիգրան Առաքելյանի եւ ՀԱԿ ակտիվիստներ Սարգիս Գեւորգյանի, Դավիթ Քիրամիջյանի ու Արտակ Կարապետյանի գործով հերթական դատական նիստի ընթացքում Տիգրան Առաքելյանը դուրս հրավիրվեց դահլիճից, իսկ նիստը հետաձգվեց մինչեւ փետրվարի 2-ը:
Երեկ Կենտրոն եւ Նորք-Մարաշ վարչական շրջանների ընդհանուր իրավասության դատարանում տեղի ունեցավ քաղբանտարկյալ Տիգրան Առաքելյանի հերթական դատական նիստը, որի ընթացքում հարցաքննվում էր յոթերորդ «տուժող» ոստիկան Շահեն Հարությունյանը: ՀԱԿ ակտիվիստ Սարգիս Գեւորգյանը «Ժողովուրդ»-ի հետ զրույցում ասաց, որ դատավոր Գագիկ Պողոսյանը հենց սկզբից ակնհայտ կերպով չէր դրսեւորում անկողմնապահ վերաբերմունք եւ չէր պահպանում հավասար մրցակցության սկզբունքը: Տիգրան Առաքելյանը հարցաքննվող ոստիկանին տալիս էր հարցեր, որոնք ակնհայտ կերպով դուր չէին գալիս դատավորին: «Եթե իրականում թեժ իրավիճակ էր, եւ տուժող կողմն օգնության համար նոր ուժեր էր կանչում, ինչո՞ւ էր ոստիկանը կանգնած սիրողական մակարդակի նկարահանումներ անում»,-այս միանգամայն տրամաբանական հարցից հետո Տիգրան Առաքելյանը դատավորի կողմից դիտողություն ստացավ, այնուհետեւ, երբ ՀԱԿ ակտիվիստները եւ նրանց պաշտպանները փորձեցին հասկանալ, թե որն է խնդիրը, ինչու մեղադրյալը չի կարող կիրառել ՀՀ Սահմանադրությամբ ամրագրված օրենքը եւ տուժող կողմին հարցեր տալ, դատավորը դա ընկալեց որպես դատարանի հետ վեճ:
Ընդհանրապես Տիգրան Առաքելյանի եւ մյուս ակտիվիստների կողմից հնչած ամեն մի նախադասություն դատավոր Պողոսյանի կողմից ընկալվում էր որպես դատական նիստի խոչընդոտում: Այնուհետեւ հայտարարվեց 20 րոպե ընդմիջում, որից հետո դատավորը որոշեց Տիգրան Առաքելյանին դուրս հանել դատական նիստի դահլիճից, մինչեւ հաջորդ նիստը:
Դատական նիստի վերսկսումից հետո ցուցմունք տվեց ոստիկան Հայկ Նաջարյանը: Վերջինիս տված ցուցմունքն ամենացնցողն էր: Պարզվում է, որ նա օգոստոսին տեղի ունեցած միջադեպի ընթացքում ծեծվել է Դավիթ Քիրամիջյանի կողմից, սակայն համեստաբար պատասխան չի տվել, ցուցաբերել է շատ մարդասիրական եւ իսկական ոստիկանին հարիր պահվածք, մասնավորապես, անընդհատ ընկերական հարցրել է. «Ի՞նչ ես անում, Դավի՛թ ջան, դիմացդ ոստիկան է, ինչո՞ւ ես ինձ հարվածում, Դավի՛թ ջան»: Նրա խոսքերից լուսնից իջած մարդիկ միայն մի հետեւություն կարող են անել` ՀՀ ոստիկանն իրեն հնազանդ ու մեղմ է պահում անկարգություն անող քաղաքացիների հետ, իսկ Կոնգրեսի ակտիվիստներն արժանի են այսօր նստել ամբաստանյալի աթոռին:
Ոստիկանի ցուցմունքից հետո պաշտպան Վահե Գրիգորյանը, չնայած դատավորի առարկությանը, դուրս եկավ դահլիճից` հրաժարվելով մասնակցել մի դատական նիստի, որի ժամանակ իր պաշտպանյալը ներկա չէ:
ՀԱԿ ակտիվիստների գործով հերթական դատական նիստը տեղի կունենա փետրվարի 2-ին: Սարգիս Գեւորգյանի կարծիքով` այն նորից կհետաձգվի, եթե դատավորը կիրառի Տիգրան Առաքելյանի հանդեպ սանկցիան:
.gif)
