Արա Բուդաղյանը կոչ է անում ընտրել Հրայր Յոլյանին

Armlur.am-ի հավաստի տեղեկություններով` հունիսի 8-ին կայանալիք Գորիսի քաղաքապետի ընտրություններին ընդառաջ ինքնաբացարկ ներկայացրած թեկնածու Արա Բուդաղյանը, ով Սյունիքի նախկին մարզպետ Սուրեն Խաչատրյանի առանձնատան մոտ նախորդ տարի սպանված Ավետիք Բուդաղյանի եղբայրն է, կոչ է անում գորիսեցիներին իրենց ձայնը տալ անկուսակցական թեկնածու Հրայր Յոլյանին:

Հիշեցնենք, որ Գորիսի քաղաքապետի պաշտոնի համար պայքարում է երկու թեկնածու`անկուսակցական Հրայր Յոլյանը և ՀՀԿ-ից առաջադրված Վաչագան Ադունցը, ում հովանավորում է Սյունիքի նախկին մարզպետ Սուրեն Խաչատրյանը: 

Տեղեկությունը ճշտելու նպատակով կապ հաստատեցինք Արա Բուդաղյանի հետ: Վերջինս հաստատեց տեղեկատվությունը:

-Պարո՛ն Բուդաղյան, ինչո՞ւ եք ցանկանում Հրայր Յոլյանին տեսնել Գորիսի քաղաքապետի պաշտոնում:

-Որովհետև Վաչագան Ադունցի հետևում կանգնած է Լիսկան:

-Իսկ գորիսեցիները կլսե՞ն ձեր կոչը:

-Ես իմ խնդրանքն այն մարդկանց եմ ուղղել, որոնք կլսեն ու կընդունեն:

-Իսկ Գորիսում ինչպիսի՞ մթնոլորտ է, լարվա՞ծ է իրավիճակը:

-Չէ՛, հանգիստ վիճակ է:

-Ձեր կարծիքով` ո՞վ կհաղթի ընտրություններում:

-Կարծում եմ` Յոլյանը:

-Տեղեկություններ կան, որ Գորիսում վախի մթնոլորտ է, և շատերը, Սուրեն Խաչատրյանից վախենալով, ստիպված ձայն պետք է տան Խաչատրյանի հովանավորյալ Վաչագան Ադունցին:

-Բայց Լիսկան ո՞վ է, որ նրանից վախենան: Նրանից վախենում են միայն թույլ մարդիկ: Ես կարծում եմ`  գորիսեցիների մեծ մասը ցանկանում է Յոլյանին ընտրել:

Սոնա Դավթյան