Քառյակի խոստացած «թեժ աշնան» գալստյան հետ ավելի ու ավելի տեսանելի է դառնում, որ անկախ սպասվող հանրահավաքային պայքարից` աշունը թեժ է լինելու նախ և առաջ հենց իր` Քառյակի համար: Արդեն իսկ հայտնի երեք ուղղություններով Քառյակի ներսում առկա տարաձայնությկուններին օրերս ավելացավ չորրորդը, և ըստ ամենայնի` ամենավճռորոշը. Ռոբերտ Քոչարյանի վերադարձի հեռանկարը: Սահմանադրական բարեփոխումների, Կուտակային կենսաթոշակների մասին նոր օրենքը ՍԴ-ում կրկին վիճարկելու, իշխանափոխության պահանջի և ամենակարևորը` Քոչարյանի վերադարձի հետ կապված հարցերում Քառյակի ներսում առկա են լուրջ հակասություններ, որոնք չհաղթահարելու դեպքում Քառյակը մոտ ապագայում կարող է վերածվել առնվազն եռյակի:
Գաղտնիք չէ, որ Քառյակի երկու ուժերը դեմ չեն նպաստել Քոչարյանի քաղաքական ռեաբիլիտացիային: Եվ եթե ՀՅԴ-ի դեպքում այս պահին կարելի է խոսել ընդամենը լոյալ վերաբերմունքի մասին, ապա ԲՀԿ- Քոչարյան անքակտելի կապը որևէ մեկի մոտ կասկածի տեղիք չի տալիս: Ինչ վերաբերում է ՙՔոչարյանի անունը լսել անգամ չցանկացող՚ ՀԱԿ-ին և ՙԺառանգությանը՚, ապա այդ երկուսից առաջինը, թերևս ինչ-որ մի պահի տեղի տա` հետևելով իր առաջնորդի «քաղաքագիտական վերլուծության» ուղերձներին, մինչդեռ «Ժառանգությունը» դժվար թե բավականաչափ շարժառիթներ ունենա սեփական հեղինակության վտանգման գնով Քոչարյանի կողքին կանգնելու համար: Ասել է թե` այս հարցում Քառյակը սպառնում է վերածվել առնվազն եռյակի:
Հաջորդ կարևոր մարտահրավերը իշխանափոխության պահանջի հնչեցումն է` լինի դա ամբողջական, թե մասնակի` կառավարության հրաժարականի պահանջի տեսքով: Այստեղ ևս սպասելի է, որ մոտեցումները միանշանակ չեն լինի: Քանզի ԲՀԿ-ի համար իշխանափոխության պահանջի անհրաժեշտությունը պայմանավորված է լինելու Քոչարյանի` վերադառնալու որոշմամբ /որը, կարծես թե ավելի հավանական է, քան երբևէ/: Ինչն էլ իր հերթին նշանակում է, որ այդ դեպքում նույն «Ժառանգությունը» չի ցանկանա անուղղակիորեն հեշտացնել Քոչարյանի հետդարձի ճանապարհը: ՀԱԿ-ն այս հարցում խնդիր չունի, քանզի ի սկզբանե էլ հնչեցրել է ամբողջական իշխանափոխության պահանջ, իսկ Դաշնակցությունն էլ, ինչպես հայտնի է, Քոչարյանի երբեմնի քաղաքական հենարանն է, և անհրաժեշտության դեպքում հաճույքով կերկրորդի իշխանափոխության կոչերը: Ստացվում է, որ այս հարցում ևս Քառյակը հանդես կգա որպես եռյակ:
Դե իսկ Սահմանադրական բարեփոխումների հետ կապված Քառյակի երեք ուժերի միակարծիքությունն արդեն իսկ հայտնի է, տարբերվում է միայն ՀՅԴ դիրքորոշումը: Եվ դարձյալ` Քառյակը խաղալու է եռյակի ռեսուրսով:
Իսկ ամենաուշագրավն այս «հրաշալի փազլում» այն է, որ ` ԲՀԿ-ն և ՀԱԿ-ը բոլոր կոմբինացիաներում էլ մնայուն տեղ ունեն, ինչը փաստում է այս ուժերի` միասնական քաղաքական խաղի մասին`ցանկացած եղանակի:
.gif)
