ԱԺ «Ժառանգություն» խմբակցության պատգամավոր Զարուհի Փոստանջյանն իր ելույթի ժամին նշեց, որ ԵՏՄ պայմանագիրն իրականում ոչ թե տնտեսական համագործակցությունների մասին է, այլ ցույց է տալիս աշխարհում տեղի ունեցող քաղաքակրթությունների բախումը, որի էպիկենտրոնն այս պահին գտնվում է Ուկրաինայում:
«Այս ամենը քաղաքակրթությունների բախում է: Ես կներկայացնեմ մի ռուս մտավորականի հարցազրույցից հատված, որը ցույց կտա, թե ինչպիսի քաղաքակրթության հետ է բախվում Հայսատանի Հանրապետությունը»,- նշեց պատգամավորը: Վերջինս ռուսերեն լեզվով ընթերցեց վերոբերյալ հարցազրույցից մի հատված, որը ցույց է տալիս հեղինակի այն տեսակետը, համաձայն որի՝ Ռուսաստանի տնտեսությունը ստվերային գործունեություն է ծավալում:
«Սա է այսօրվա Ռուսաստանը»,- ասաց Փոստանջյանը:
Գալուստ Սահակյանը միջամտեց, ասելով, որ Փոստանջյանը խախտում է լեզվի մասին ՀՀ օրենքը: Փոստանջյանն էլ զարմացավ. «Դուք ռուսերեն չե՞ք հասկանում: Սա այսօրվա Ռուսաստանն է, որին դուք ցանկանում եք անդամակցել: Դուք շուտով, եթե շարունակեք այդպես, այս ամբիոնից հենց ռուսերենով եք խոսելու: Ես հենց այնպես չեմ խոսում ռուսերենով: Այդ լեզվով նախկինում հենց Դուք եք աշխատել»:
«Դուք խախտում եք լեզվի մասին օրենքը: Եթե պիտի ռուսերենով ելույթ ունենայիք, պետք է նախապես զգուշացնեիք»,- միջամտեց Գալուստ Սահակյանը:
Զարուհի Փոստանջյանը նշեց, որ ինքը սրտի մեծ ցավով է արձանագրում, որ մեր ազգային սուվերենությունն այսքան հեշտ ու հանգիստ ի չիք է դառնում:
.gif)
